Manyan Labarai
Zamu bai wa fannin masana’anatar Fatu da Ƙiraga mahimmanci domin samawa matasa aikin yi – Gwamnatin tarayya
Gwamnatin tarayya ta ce a ƙoƙarin ta na farfaɗo da harkokin sana’ar Fatu da Ƙiraga a ƙasar nan, ta ce za ta ƙara bai wa fannin mahimmanci, domin samawa al’umma musamman ma matasa aikin yi da za su dogara da kan su, tare da rage musu rashin aikin yi a ƙasa.
Ministan ma’aikatar Ƙirƙira da Fasaha ta ƙasa Cheif Uche G Nnaji, ne ya bayyana hakan, a yayin taron ƙaddamar da cibiyar sarrafa Fatu da Ƙiraga, da kwalejin koyon ayyukan sarrafa Fatu ta NILEST, ta gina a ofishin shiryar da ke garin Zawaciki a nan Kano, wanda taron ya gudana a ƙarshen makon nan.
Ministan da ya samu wakilcin Darakta Chemical na ma’aikatar ƙirƙira da Fasaha ta ƙasa Dakta Bassey, ya ce, samar da sashin koyar da sanin fatu da ƙiraga da cibiyar ta NILEST, tayi a nan Kano, abu ne da zai taimakawa matasa wajen samun aikin yi, ta yadda za su dogara da kan su, tare kuma da rage musu rashin aikin yi a faɗin ƙasa.
Da yake nasa jawabin daraktan cibiyar sarrafa Fatu da Ƙiraga ta NILEST, a ƙasar nan, Farfesa Muhammed Kabir Yakubu, ya shaidawa Dala FM Kano, cewa, yawan cin naman Ganda da da mutane ke yi na Fatar Dabbobi, da ƙarancin wutar lantarki a ƙasa, na daga cikin babban kalubalen a harkar sarrafa Fatu da Ƙiraga.
Farfesa Muhammed Kabir Yakubu, ya kuma yi kira ga matasa da su ƙara tashi tsaye wajen riƙo da ƙananan sana’o’i ta yadda za su rinƙa dogaro da kan su a faɗin ƙasar nan.
Wannan dai na zuwa ne a dai-dai lokacin da mafi yawan matasa ke fuskantar ƙarancin abun yi a sassan ƙasar nan, lamarin da hakan kan haifar musu da koma baya a rayuwar su, fatan dai kowanne ɓangare za’ayi abinda ya dace, dan ganin al’umma musamman ma Matasan sun fice daga cikin halin rashin aikin yin a ƙasa.
Wani mazaunin ƙofar Na’isa wanda ya buƙaci a sakaye sunansa, ya ce faɗan dabar da ya ƙi ci ya ƙi cinyewa a yankin da Ɗan Agundi, laifin iyaye ne, da kuma wasu manya a unguwannin da ake zargin suna goya musu baya ta hanyar daƙile yunƙurin hukumomi na ɗaukar doka a kansu.
Mutumin ya bayyana hakan ne yayin zantawar sa da gidan rediyon Dala FM, biyo bayan yadda rikicin faɗan dabar ya sake ɓarkewa a unguwannin a Alhamis ɗin nan, al’amarin da ya janyo asarar dukiyoyin al’umma a yankunan.
Ya ce lamarin ya faro ne tun a lokacin bikin ƙaramar Sallah, lamarin da a baya ƙura ta lafa, sai dai kuma a ranar Alhamis ɗin sai gashi an sake samun faɗan dabar.
A cewar sa, “A lokacin faɗan dabar ya faru an Sassari mutane da dama, hatta Saniya ma ba ta tsira ba sai da aka sareta, tare da fasa gilasan ababen hawan Mutane, “in ji shi”.
Sa dai mutumin ya ce, tuni jami’an tsaron Ƴan Sanda, suka kai ɗauki tare da kwantar da tarzoma, lamarin da ƙurar ta lafa.
Hukumar kula da zirgar-zirgar ababen Hawa ta jihar Kano, KAROTA, ta ce ba za ta lamunta da yadda ake yawan kai wa jami’anta farmaki ba, na ba gaira babu dalili yayin da suke gudanar da ayyukan su.
Shugaban Hukumar KAROTA, a Kano, Injiniya Faisal Mahmud Kabir, ne ya yi wannan gargaɗin ta cikin sanarwar da kakakin hukumar Abubakar Ibrahim Sharada ya aikowa tashar Dala FM Kano, a ranar Laraba 09 ga watan Afrilun 2025.
“Hakan na zuwa ne biyo bayan wani mummunan hari da wasu mutane da ke cikin baburin Adai-daita sahu suka kai wa jami’an na mu yayin da suke tsaka da aikinsu a titin da ke dab da gidan Buhari kan hanyar zuwa Gidan Zoo, “in ji shi“.
Sanarwar ta ce, tunda farko an tsayar da wani mai baburin Adai-daita Sahu ne inda yaƙi tsayawa, sai kawai aka hango mai ɗan sahun ya naushi jami’in karotar.
Sai dai a ta bakin Shugaban kungiyar ‘Yan Adai-daita Sahu a jihar Kano, ya ce waɗannan mutane ba halattattun ‘Yan Adai-daita Sahu ba ne, sun dai fake da sana’ar su dan aikata ta’addanci.
Daga bisani dai jami’n hulɗa da jama’a na Hukumar Koratar, Abubakar Ibrahim Sharada, ya ce hukumar za ta ɗauki tsattsauran mataki akan lamarin, don kare afkuwar irin hakan a gaba.
Hukumar ta ce duk wanda ya ga faruwar wani abu da ya shafe ta, ko kuma ƙorafe-ƙorafe, zai iya kiran waɗannan lambobin domin sanar da ita, da suka haɗar da 09015709449 ko 08059689422 ko kuma 08067311520.
Ƙungiyar sintirin Bijilante ta ƙasa reshen jihar Kano, ƙarƙashin jagorancin kwamandan ta Ubale Barau Muhammad Badawa, ta tabbatar da rasuwar guda daga cikin jami’in ta mai suna Suraj Rabi’u mazaunin Jaba da ke ƙaramar hukumar Fagge a jihar, sakamakon arangama da ƴan Daba.
Mai magana da yawun ƙungiyar Bijilante na jihar Kano, kuma Kwamandan ta na ƙaramar hukumar Fagge, Usman Muhammad Ɗan Daji, shi ne ya bayyana hakan ta cikin wani saƙon murya da ya aikowa Dala FM Kano a ranar Lahadi.a
“Jami’in Bijilanten namu ya rasa ran nasa ne sakamakon arangama da suka yi da wasu Ƴan Daba yayin gudanar aikinsu a ranar Idin ƙaramar Sallah, inda ƴan dabar suka soke shi da Ɗanbida a Ƙirji da bayansa, wanda ya yi sanadiyar rasuwarsa, “in ji Usman”.
Ya kuma ce, an kama ɗaya daga cikin waɗanda ake zargi mai suna Usman Sharif mazaunin ƙaramar hukumar Dala, kuma tuni aka miƙa shi hannun jami’an tsaro.
Usman Ɗan daji, ya kuma yi addu’ar Allah ya jiƙan jami’in nasu ya gafarta masa.
-
Nishadi5 years agoIna neman mijin aure – Rayya
-
Labarai4 years agoHamisu Breaker ya kai kan sa wajen ‘yan sanda
-
Nishadi5 years agoMansura Isah ta yi kaca-kaca da Sadiya Haruna
-
Manyan Labarai5 years agoKAROTA: An baiwa Baffa Babba wa’adin kwanaki bakwai
-
Labarai5 years agoAuren dan Panshekara da ba Amurkiya ya samu cikas
-
Lafiya3 years agoRahoto: An gano wani gida da ake gini da takardun Kur’ani da Alluna
-
Manyan Labarai5 years agoSabuwar damfarar da ta fito a Kano
-
Nishadi5 years agoAn gano daliban da Adam Zango ya dauki nauyin karatun su