Babbar kotun jiha mai lamba 24 karkashin jagorancin mai Shari’a Aisha Mahmud, ta sanya ranar 12 ga watan gobe dan sauraron shaidu a kunshin tuhumar da gwamnatin jaha ta ke yi wa wasu mutane 2.

Gwamnatin jiha ce dai ta gurfanar da mutanen biyu masu suna Abdul’aziz Adamu, mai kayan miyar nan da aka samu gawarwaki guda biyar a gidan sa da ke ƙaramar hukumar Dawakin Kudu, a baya, da kuma Abdullahi Alhassan, waɗanda ake zargi da laifin haɗa baki da garkuwa da mutane da kuma laifin kisan kai.

Lauyan gwamnati Lamido Abba Soron Dinki ne ya roki kotun da ta yi umarnin a karanta kunshin zargin, inda kotun ta amince da rokon.

Ƙunshin zargin ya bayyana cewar mutanen sun haɗa baki sun ɗauke wani mutum mai suna Alhaji Ali Alhassan, sun yi garkuwa da shi, tare kuma da karɓar Kuɗi har Naira Miliyan 15, a hannun iyalinsa da zummar za su sake shi, a karshe an yi zargin sun buga masa wani karfe a kansa har ya riga mu gidan gaskiya.

Yayin da aka karanta wa mutanen ƙunshin zargin da ake yi musu a kotun sun musanta, sai dai mai gabatar da ƙara ya bayyana cewar suna da shaida inda aka kuma umarci shi da ya kawo shaidar akan shari’ar.

Lauyoyin waɗanda ake zargi sun roki kotun da ta yi umarnin a basu kundin bincike, inda kotun ta amince da rokon.

Bayan fitowa daga kotun wakilinmu Yusuf Nadabo Ismail ya zanta da lauyan gwamnati Lamido Abba Soron Dinki Wanda ya bayyana cewar za su gabatar da shaida akan shari’ar.

Da yake nasa jawabin lauyan wanda ake ƙara na farko, Barrister Muhammad Sulaiman Ahmad, ya ce aikin lauya shi ne ya taimaka a gano gaskiyar magana yadda take.

Wakilinmu Yusuf Nadabo Isma’il ya ruwaito cewar, an samu gawarwaki guda biyar a gidan Abdul’aziz Aziz Adamu mai kayan miya, da ke zaune a ƙaramar hukumar Dawakin Kudu, wadanda ake zargi da kashe su sama da shekara daya.

Babbar kotun jaha mai lamba 4 karkashin jagorancin mai Shari’a Usman Na Abba ta yi hani ga duk wasu Jami’an Ƴan sanda ko na duk wata hukuma ta daban daga gayyata ko tsangwama, ko kuma bincike ko kamawa, ta kowace siga ga kwamishinan ayyuka na musamman na jihar Jigawa Auwalu Ɗanladi Sankara.

Wannan dai na zuwa ne bayan da kotu ta wanke Auwalu Sankara daga zargin mu’amala ko alaƙa da juna tsakanin mai ƙara da Taslim Baba Nabegu har zuwa lokacin sauraran ƙarar.

Kotun ta kuma amince da rokon da wani lauya mai suna Barrister I.C Ekpinovi ya yi amadadin mai kara Auwalu Danladi Sankara wanda ya yi karar Nasiru Buba.

Mai karar ta bakin lauyansa ya bayyana wa kotun rokonsa inda ya roki kotun da ta dakatar da wanda ake kara ko dai shi da kansa ko kuma ƴan korensa daga ci gaba da yaɗa wata magana wadda wata babbar kotun Shari’ar Muslunci da ke Kano ta rufe.

Mai Shari’a Usman Na Abba ya ayyana cewar ko dai wanda aka yi kara ko yan korensa ko kuma wasu wakilansa, da a dai na yaɗa waccan magana har zuwa lokacin da kotun za ta saurari kowanne ɓangare.

Kotun ta ayyana cewar ta yi hani ga duk wata kafa ta yada labarai ko dai Rediyo ko Talabijin, ko shafukan sada zumunta da kafar Intanet da duk wata kafa wadda take iya sadar da labarai, daga yaɗa labaran da suka shafi Auwalu Ɗanladi Sankara da Taslim Baba Nabegu.

A ranar Talata ne dai gwamnan jihar Jigawa Mallam Umar Namadi ya bayyana mayar da Auwalu Ɗanladi Sankara muƙamin sa na Kwamishinan ayyuka na musamman a jihar, bayan da kotu ta wanke shi daga zargin da hukumar Hisbah ta Kano, ta yi masa kan zargin baɗala da wata matar aure.

Wakilinmu Yusuf Nadabo Isma’il ya ruwaito cewa kotun ta kuma sanya ranar 28 ga wannan watan na Nuwamba dan sauraron kowane ɓangare akan shari’ar.

Babbar Kotun jaha mai lamba huɗu da ke zamanta a sakateriyar Audu Bako a Kano, ƙarƙashin jagorancin mai Shari’a Usman Na’abba, ta bayyana matsayarta akan hukuncin da ta yanke dangane da shari’ar da ake yi a tsakanin Ali Musa Hardworker da Jam’iyyar NNPP a Kano.

Kotun ta ayyana cewar kowanne ɓangare ya dakata da batun rantsuwar kama aiki har zuwa lọkacin da kotun ɗaukaka ƙara za ta ayyana matsayarta.

Idan dai ba’a manta ba Dala FM ta ruwaito yadda a baya kotun ta ayyana Ali Musa Hardworker a matsayin halastaccen ɗan takarar lamarin da ya sanya jam’iyyar NNPP da Ghali Basaf suka ɗaukaka ƙara akai.