Manyan Labarai

An harbe matashi har lahira a Kano

Published

5 years ago

06/02/2020

Wasu ‘yan fashi da makami da ba a iya gane su ba dauke da bindigogi a na zargin sun shiga gidan wani mutum mai suna Alh. Munir Na’iya a unguwar Hotoron Maradi dake karamar hukumar Tarauni.

‘yan fashin sun karbe masa tarin kudi masu yawa a cikin jaka kafin daga bisani su ka tafi suna harbe-harbe a iska a yammacin ranar Laraba.

A zantawarsa da gidan rediyon Dala Alh. Munir ya ce, “Ina kwance na ji su na buga min gidana, sun tadda mata a daya gidan, na za gaya na fita sai su ka shigo da ni, su na harbe-harbe, su kace kudi na ce to, kafin ma na hau sama wani ya shiga su ka ta harbe-harbe su ka fita”. A cewar sa.

Ita kuwa ‘yar mai gidan Fatima Munir ta ce, “Mu na zaune sai na ga baban mu ya fito da sauri, fitowar da za mu yi bakin kofa sai na ga sun rike baban mu, sai na ce mai za ku yi wa baban mu, me ya yi muku? Sai babar mu ta riko wuyanta sai ya sakar ma ta bindiga, ni kuma ganin ya sakar ma ta bindiga sai na riko wuyan dayan, sai ya kifa min mari”.

Bayan ‘yan fashin sun fito daga gidan ne su ka fara harbe-harbe wanda sanadiyar hakan ne a ka yi zargin sun harbe makocin Alhajin, mai suna Ali Usman har lahira kamar yadda abokin sa da su ke tare a lokacin ya shaida mana, “Mu na dakina mu na kallo da wanda ya rasu, sai wani abokina ya shigo ya ce unguwar nan babu lafiya ya ce ya ga wasu mutane sun yi sallama da makocin mu su na harbe-harbe sun shiga gidan, mun fito bayan sun wuce sai mu ka ga an harbi abokin namu”. Inji abokin marigayin.

Kazalika mun tuntubi rundunar ‘yan sandan jihar Kano ta bakin Kakakin ta DSP Abdullahi Haruna Kiyawa wanda ya ce, za su bincika al’amarin.

Manta Sabo

Kotu ta hana duk wata kafar yada labarai yin labarin da ya shafi Auwalu Danladi Sankara da Taslim Baba Nabegu.

Published

2 days ago

19/11/2024

Hassan Mamuda Ya'u

Babbar kotun jaha mai lamba 4 karkashin jagorancin mai Shari’a Usman Na Abba ta yi hani ga duk wasu Jami’an Ƴan sanda ko na duk wata hukuma ta daban daga gayyata ko tsangwama, ko kuma bincike ko kamawa, ta kowace siga ga kwamishinan ayyuka na musamman na jihar Jigawa Auwalu Ɗanladi Sankara.

Wannan dai na zuwa ne bayan da kotu ta wanke Auwalu Sankara daga zargin mu’amala ko alaƙa da juna tsakanin mai ƙara da Taslim Baba Nabegu har zuwa lokacin sauraran ƙarar.

Kotun ta kuma amince da rokon da wani lauya mai suna Barrister I.C Ekpinovi ya yi amadadin mai kara Auwalu Danladi Sankara wanda ya yi karar Nasiru Buba.

Mai karar ta bakin lauyansa ya bayyana wa kotun rokonsa inda ya roki kotun da ta dakatar da wanda ake kara ko dai shi da kansa ko kuma ƴan korensa daga ci gaba da yaɗa wata magana wadda wata babbar kotun Shari’ar Muslunci da ke Kano ta rufe.

Mai Shari’a Usman Na Abba ya ayyana cewar ko dai wanda aka yi kara ko yan korensa ko kuma wasu wakilansa, da a dai na yaɗa waccan magana har zuwa lokacin da kotun za ta saurari kowanne ɓangare.

Kotun ta ayyana cewar ta yi hani ga duk wata kafa ta yada labarai ko dai Rediyo ko Talabijin, ko shafukan sada zumunta da kafar Intanet da duk wata kafa wadda take iya sadar da labarai, daga yaɗa labaran da suka shafi Auwalu Ɗanladi Sankara da Taslim Baba Nabegu.

A ranar Talata ne dai gwamnan jihar Jigawa Mallam Umar Namadi ya bayyana mayar da Auwalu Ɗanladi Sankara muƙamin sa na Kwamishinan ayyuka na musamman a jihar, bayan da kotu ta wanke shi daga zargin da hukumar Hisbah ta Kano, ta yi masa kan zargin baɗala da wata matar aure.

Wakilinmu Yusuf Nadabo Isma’il ya ruwaito cewa kotun ta kuma sanya ranar 28 ga wannan watan na Nuwamba dan sauraron kowane ɓangare akan shari’ar.

Manyan Labarai

Zargin Baɗala: Kotu ta wanke Auwalu Sankara da Taslim Baba Nabegu a Kano.

Published

3 days ago

18/11/2024

Hassan Mamuda Ya'u

Babbar kotun Shari’ar Muslunci mai zaman ta a kofar kudu ƙarƙashin jagorancin mai Shari’a Ibrahim Sarki Yola, ta sallami dakataccen kwamishina a jihar Jigawa, Auwalu Ɗanladi Sankara da Taslim Baba Nabegu.

Tun da farko kotun ce ta tura ofishin ƴan Sanda Shiyya ta ɗaya da ke jihar Kano, wato Zone 1, domin mukaddashin babban sifetan yansanda ya binciki zargin da ake wa Auwalu Danladi da Taslim Baba Nabegu, sakamakon korafin da wani mutum Mai suna Nasiru Buba ya yi, wanda ya zargi Auwalun da cewar suna yin mu’amalar da bata dace ba.

Cikin ƙunshin takaddar da muƙaddashin babban sifetan ƴansanda ya tura wa kotun ya bayyana cewar, hukumar Hisbah ta yi azarɓaɓi akan batun, kuma ya umarce su da su rinƙa yin aiki a bisa tsarin doka.

A zaman kotun na yau mai Shari’a Sarki Yola ya ayyana cewar babu tuhuma akan waɗanda ake zargin sakamakon yadda ƴan sanda suka gudanar da bincike, inda suka ce sun samu cewar maganar Jita-jita ce kuma Shari’a bata karɓar jita-jita.

Har ila yau, ma’aikatar Shari’a ta jahar Kano ta bayyana cewar babu tuhuma akan waɗanda ake zargin sakamakon rashin gamsassun hujjoji.

Mai Shari’a Ibrahim Sarki Yola ya ayyana cewar ya sallami Auwalu Danladi Sankara da Taslim Baba Nabegu nan take, kuma kotun ta umarci kowa ya zauna lafiya.

Wakilinmu Yusuf Nadabo Isma’il ya ruwaito cewa, da yake jawabi lauyan wanda ake ƙara Barrister Saddam Sulaiman, ya ce dama maganar siyasa ce ta shigo cikin al’amarin.

Manyan Labarai

Masu Garkuwa da mutanen da muka kama a dajin Ɗansoshiya sun rasu – Ƴan Sandan Kano

Published

2 weeks ago

09/11/2024

Hassan Mamuda Ya'u

Rundunar ƴan sandan jihar Kano ta ce masu Garkuwa da mutane su biyun da ta kama a dajin Ɗansoshiya da ke kwanar Ɗangora a ƙaramar hukumar Ƙiru a jihar sun rasu.

Jami’in hulɗa da jama’a na rundunar ƴan sandan SP Abdullahi Haruna Kiyawa ne ya sanar da hakan a shafin sa na sada zumunta a cikin daren Asabar 09 ga watan Nuwamban 2024.

Tun dai da safiyar Asabar ne rundunar ta ce ta cafke mutane biyun da ta ke zarginsu da shiga jihar Kano, domin yin garkuwa da mutane tare da neman kuɗin fansa.

SP Abdullahi Haruna Kiyawa, ya bayyana cewa, an kama mutanen ne a garin Kwanar Dangora, kuma, suna hannun ‘yan sanda domin fadada bincike, ko da ike yanzu haka tuni suka riga mu gidan gaskiya.

Majiyar Dala FM Kano ta rawaito cewa SP Kiyawa ya kuma ƙara da cewa, yanzu ta’addancin satar mutane ba za ta yi tasiri a Jihar Kano ba da yardar Allah’.

Mai magana da yawun rundunar ƴan sandan na Kano, ya kuma gode wa al’ummar jihar bisa addu’o’in da suke yi a kullum.

Tuni dai Kiyawa ya wallafa hotunan gawar mutanen biyu da ake zargin masu garkuwa da mutane ne a shafin sa na Facebook.