Labarai

Mu na tattara asarar da a ka yi a tashar wutar lantarki -KEDCO

Published

4 years ago

06/07/2020

Wata gobara da tashi a gidan wutar lantarki dake Dan Agundi a karamar hukumar birni a jihar Kano a na zargin ta kona wasu muhamman kayayyaki.

Al’amarin ya faru ne da misalin karfe sha daya na safe a yau Litinin, inda wasu shaidun gani da ido su ka bayyana wa wakilin mu yadda al’amarin ya faru.

Su na cewa, “Sai mu ka ga wuta ta fara tashi daga cikin gidan wuta, kafin wutar ta fara ci mu ka hangi wani hayaki. Mu na bakin titi sai mu ka ga wuta ta tashi jajawur, babban dauki da mu ka fara yi, mun yi kokarin a fara kashe wutar da kayan aikin gidan abun ya gagara, sai mu ka kira jami’an kashe gobara su ka zo su ka kashe ta”. A cewar shaidun gani da ido.

Sai dai ko da wakilin namu Abba Isah Muhammad ya tuntubi manajan kamfanin rarraba wutar lantarki na TCN a jihar Kano, MK Bello ya ce, abun bai shafe su ba.

Kazalika, ko da ya tuntubi kakakin hukumar rarraba wutar lantarki na KEDCO a jihar Kano, Ibrahim Shawai, ta wayar tarho ya ce, ya zuwa yanzu su na tattara alkaluma na asarar da a ka yi.

A nasa bangaren, Jami’in hulda da jama’a na hukumar kashe gobara ta jihar Kano, PFO Sa’idu Muhammad Ibrahim ya ce, “Mun samu kira daga wannan tasha ta Dan Agundi da misalin karfe goma sha daya na safe ta bakin wani mutum Injiniya Hassan Muhammad, kuma jami’an mu sun isa wurin sun tarar babban Injin raba wutar ne ya kama da wuta, kuma sun yi kokarin kashe wutar. Babu asarar rai ko jikkata, ya zuwa yanzu a na bincike domin gano abun da ya jawo tashin wutar”. Inji PFO Sa’idu Muhammad.

Wakilin mu Abba Isah Muhammad ya rawaito cewa, PFO Sa’idu ya kuma ja hankalin al’umma da cewa, yayin da su ka ga wata wuta da ba’a gane mata ba a yi gaggawar sanar da hukumar kashe gobara a kan lokaci domin ta zo ta bada gudunmawa.

Labarai

Sarkin Kano Khalifa Muhammadu Sunusi na biyu, ya naɗa Ɗan Sa a matsayin Chiroman Kano.

Published

1 week ago

15/11/2024

Hassan Mamuda Ya'u

Mai martaba sarkin Kano Dakta Khalifa Muhammadu Sunusi na biyu, ya buƙaci dukkanin hakimansa da ke faɗin jihar nan da su mayar da hankali wajen gudanar da aikin su bisa gaskiya da riƙon Amana.

Sarkin ya bayyana hakan ne a lokacin da ya naɗa DSP Aminu Lamiɗo Sunusi a matsayin Chiroman Kano, kuma babban ɗan fadar Sarki, yau Juma’a a fadar sa.

Khalifa Muhammadu Sunusi na biyu, ya ce ya naɗa DSP Aminu Lamiɗo Sunusi a matsayin Chiroman Kano, ne bisa cancanta da zuminci da kuma gogewarsa akan aikinsa na ƴan sanda, tare kuma da taimakawa al’umma da yake yi a koda yaushe.

Mai martaba sarkin ya kuma taya Chiroman Kano, murna bisa wannan naɗin da aka yi masa, tare da fatan zai zamo jakada na gari musamman wajen samar da cigaban Al’umma da kuma masarautar Kano.

Wakilinmu na masarautar Kano Shamsu Da’u Abdullahi ya rawaito cewa taron naɗin ya samu halartar gwamnan jihar Kano Injiniya Abba Kabir Yusuf, da sarakunan gargajiya daga wasu daga cikin jahohin ƙasar nan.

Labarai

Za mu magance matsalolin da hukumar Hisbah ta Dala ke fuskanta – Shugaban ƙaramar hukumar Dala

Published

2 weeks ago

11/11/2024

Hassan Mamuda Ya'u

Ƙaramar hukumar Dala ta ce za ta yi bakin ƙoƙarin ta wajen magance matsalolin da hukumar Hisbah ta ƙaramar hukumar Dala ke fuskanta, domin ƙara ƙarfafa musu gwiwa wajen gudanar da ayyukan al’umma.

Shugaban ƙaramar hukumar Suraj Ibrahim Imam ne ya bayyana hakan, a lokacin da jami’an hukumar Hisbah ta ƙaramar hukumar Dala, suka ziyarce shi a ofishinsa, domin taya shi murnar nasarar cin zaɓe da suka yi, tare da sanar dashi halin da hukumar Hisbar ke ciki a halin yanzu.

“Daga cikin ƙalubalen da zan yi ƙoƙarin magance wa akwai samar da ruwa da wutar lantarki da kuma samar wa hukumar kayan aiki, bisa yadda suke fama da rashin su, “in ji Suraj Imam”.

Shugaban ƙaramar hukumar ta Dala Sura ya kuma yi kira ga babban kwamandan hukumar Hisbah ta jihar Kano Sheikh Aminu Ibrahim Daurawa, da ya ƙara kulawa da walwalar hukumar ta ƙaramar hukumar Dala bisa ƙalubalen da suke fuskanta.

Da yake nasa jawabin kwamandan hukumar Hisbah ta ƙaramar hukumar Dala Mallam Umar Bala Muhammad, ya ce sun ziyarci shugaban ƙaramar hukumar ne domin taya shi murnar nasarar cin zaɓe da kuma sanar da shi halin da hukumar ke ciki, domin haɗa ƙari da ƙarfe wajen magance ƙalubalen da suke fuskanta.

Wakiliyarmu Hadiza Balanti ta rawaito cewa Mallam Umar Bala ya kuma ƙara da cewa a shirye hukumar hisbar ta ƙaramar hukumar Dala take wajen gudanar da ayyukan al’umma babu gajiyawa.

Labarai

Mun dakatar da karɓar kuɗin haraji a Fagge har sai an kammala bincike – Shugaban Ƙaramar hukumar Fagge

Published

4 weeks ago

29/10/2024

Hassan Mamuda Ya'u

Ƙaramar hukumar Fagge ta dakatar da dukkannin harkokin karɓar haraji har zuwa lokacin da za’a kammala bincike, don tabbatar da cewa bangaren harajin nayin aiki bisa doka domin ciyar da ƙaramar hukumar gaba.

Shugaban ƙaramar hukumar ta Fagge Salisu Usman Masu ne ya bayyana hakan yayin zantawar sa da tashar Dala FM Kano, a safiyar yau Talata.

Salisu Usman ya kuma bayyana cewar duk filotan da aka yanka aka sayar ko aka bayar ba bisa ƙa’ida ba shima an soki shi.

Shugaban ya kuma yi kira ga ƴan kwangila waɗanda suka watsar da ayyukan da aka basu da su dawo bakin aiki ka’in da na’in.

A cewar sa, “Na fahimci irin kalubalen da ke damun al’umma a ɓangaren lafiya a ƙaramar hukumar mu ta Fagge; kuma za mu yi ƙoƙarin samar da kayan aiki domin magance matsalar, “in ji shi”.

Masu ya kuma bayyana cewar ƙaramar hukumar ta Fagge za ta inganta harkar ilimi da tsaro, da Lafiya, inda kuma yi kira ga duk wani mai kaunar ci gaban karamar hukumar Fagge da ya taho a hada hannu ko da shawara zai bayar dan ciyar da karamar hukumar gaba.