Labarai

Mu guji yada hotunan yaran da a ka yiwa fyade – Hajiya Gambo

Published

4 years ago

27/07/2020

Shugabar kungiyar wayar da kan iyaye mata da sauran al’umma a kan yadda za’a dakile matsalolin da su ke damun mata, Hajiya Gambo A. Garba ta ce, yawancin fyaden da a ke yadawa a social media ba a jihar Kano a ke yin sa ba, amma a ke dauka a dora a ce Kano a ka yi.

Hajiya Gambo A. Garba ta bayyana hakan ne a zantawar ta da gidan redyon Dala, jim kadan bayyan kammala taron addu’a domin kawo karshen matsalolin da su ka shafi yara, a ranar Litinin.

Ta na mai cewa, “A nazarin da na yi a jihar Kano akwai karancin fyade, amma a social media a nuna mata ace an yi musu fyade, to mu ji tsoron Allah, domin irin wadannan hotuna na kawo karuwar fyade, a taimaka wajen ilimantar da al’umma, a daina barin gwamnati ita ce za ta gyara komai”.

Ta kuma ce,“Idan mutum yaga irin abubuwan nan na fyade a social media, ya goge, domin idan ‘ya’yan mu ne ba za mu yada ba, me yasa za mu rinka yada na wasu? sannan gwamnati ta yi doka a kan masu sayar da maganin gargajiya na maza, domin shima ya na taimakawa wajen yawaitar fyade”. A cewar Hajiya Gambo

A nata jawabin, Kwamishiniyar mata ta jihar Kano, Dr Zahra’u Muhammad ta ce,“ Al’umma su ci gaba da addu’a, domin Kano bama cikin matsala kamar yadda makwabtan jihohi su ke ciki, a yiwa shugabanni addu’a suma domin mu ji dadi, iyaye su kula da ‘ya’ya tare da addu’ar Allah ya bayar da damar yin tabiyar su”. Inji Dr. Zahra’u

Wakilin mu Ibrahim Abdullahi Soron dinkI ya rawaito cewa, Hajiya Gambo ta kuma ja hankalin magidanta da su rinka taimakawa mata, su daina barin su dawainiyar gida su kadai.

Labarai

Mun dakatar da karɓar kuɗin haraji a Fagge har sai an kammala bincike – Shugaban Ƙaramar hukumar Fagge

Published

1 week ago

29/10/2024

Hassan Mamuda Ya'u

Ƙaramar hukumar Fagge ta dakatar da dukkannin harkokin karɓar haraji har zuwa lokacin da za’a kammala bincike, don tabbatar da cewa bangaren harajin nayin aiki bisa doka domin ciyar da ƙaramar hukumar gaba.

Shugaban ƙaramar hukumar ta Fagge Salisu Usman Masu ne ya bayyana hakan yayin zantawar sa da tashar Dala FM Kano, a safiyar yau Talata.

Salisu Usman ya kuma bayyana cewar duk filotan da aka yanka aka sayar ko aka bayar ba bisa ƙa’ida ba shima an soki shi.

Shugaban ya kuma yi kira ga ƴan kwangila waɗanda suka watsar da ayyukan da aka basu da su dawo bakin aiki ka’in da na’in.

A cewar sa, “Na fahimci irin kalubalen da ke damun al’umma a ɓangaren lafiya a ƙaramar hukumar mu ta Fagge; kuma za mu yi ƙoƙarin samar da kayan aiki domin magance matsalar, “in ji shi”.

Masu ya kuma bayyana cewar ƙaramar hukumar ta Fagge za ta inganta harkar ilimi da tsaro, da Lafiya, inda kuma yi kira ga duk wani mai kaunar ci gaban karamar hukumar Fagge da ya taho a hada hannu ko da shawara zai bayar dan ciyar da karamar hukumar gaba.

Labarai

Ku guji tada hankalin al’umma yayin zaɓen ƙananan hukumomi a Kano – Human Right

Published

2 weeks ago

26/10/2024

Hassan Mamuda Ya'u

Ƙungiyar kare haƙƙin ɗan adam ta Global Community for Human Right Network, ta buƙaci al’umma musamman ma Matasa da su kasance masu bin doka da oda tare kuma da gujewa tayar da hankalin jama’a a yayin gudanar da zaɓen ƙananan hukumomin da za ayi a yau Asabar.

Shugaban gudanarwar ƙungiyar na Ƙasa Kwamared Tasi’u Idris Idris (Soja) ya bayyana wa tashar Dala FM Kano, hakan a safiyar Asabar.

Ya kuma ce bai kamata al’umma su kasance masu taka doka ba, domin bin doka shi ne wayewa.

“Muna kuma kira ga jami’an tsaro da su bada gudunmawar su yayin zaɓen domin ganin an gudanar da zaɓen ƙananan hukumomin cikin kwanciyar hankali, “in ji Tasi’u”.

Da yake nasa jawabin daraktan ƙungiyar Kwamared Gambo Madaki, kira ya yi ga dukkanin ƴan ƙungiyar su na ƙananan hukumomin Kano 44, da ku guji sanya kayan ƙungiyar su yayin gudanar da zaɓen kasancewar ba sa cikin masu aikin zaɓen ko kuma sanya ido, domin gujewa fuskantar matsala.

Tuni dai hukumar zaɓe ta jihar Kano Kanseic, ta ce za’a fara kaɗa ƙuri’a ne da misalin ƙarfe takwas na safiyar yau Asabar.

Labarai

Sarkin Kano ya ɗaga likkafar Alhaji Abbas Ɗalhatu daga Ƴan Daka, zuwa Bauran Kano, da naɗa hakimai 10

Published

2 weeks ago

25/10/2024

Hassan Mamuda Ya'u

Mai martaba sarkin Kano Dakta Khalifa Muhammadu Sunusi na biyu, ya naɗa Alhaji Abbas Ɗalhatu shugaban rukunin gidajen Freedom Radio da Dala FM, a matsayin Bauran Kano, bayan da ya ɗaga likkafar sa daga Ƴan Ɗakan Kano.

Sarkin ya naɗa hakiman ne da safiyar yau Juma’a, inda ya kuma naɗa hakimai goma a matakai daban-daban, daga cikin su akwai Kacallan Kano, da Dan Adalan Kano, da mai unguwar Munduɓawa kuma hakimin Gezawa, da sauransu.

Da yake jawabi jim kaɗan da ɗin hakiman da kuma ɗaga likkar Alhaji Abbas Ɗalhatu zuwa Bauran Kano, mai martaba Sarkin Kano Dakta Khalifa Muhammadu Sunusi na biyu, ya ce an naɗa hakiman ne bisa jajirecewar su da taimaka wa al’umma da kuma biyayya ga masarautar Kano.

Sarkin na Kano Khalifa Muhammadu Sunusi na biyu, ya kuma hori dukkanin hakiman da su mayar da hankali akan samar da ci gaban al’ummar jihar Kano da ma ƙasa baki ɗaya.

Wakilinmu Yakubu Ibrahim Doragarai ya ruwaito cewa a yayin naɗin al’umma da dama ne suka samu damar halarta daga ciki da wajen ƙasar nan.