Gwamnatin Kano za ta ƙara wadata ruwa ga mazauna birnin jihar cikin mako guda

Gwamnatin Jihar Kano tace, za ta ƙara faɗaɗa rarraba ruwa ga jama'a a faɗin Jihar cikin mako guda.

Kwamishinan Albarkatun Ruwa, Muhalli da Sauyin Yanayi na Jihar Kano, Dr. Dahiru Muhammad Hashim, ya ce ana sa ran za a ƙara faɗaɗa rarraba ruwan sha ga jama’a a faɗin jihar cikin mako guda mai zuwa.

Kwamishinan ya bayyana hakan ne yayin da yake magana a shirin Barka da Hantsi na gidan rediyon Freedom Radio, inda ya yi bayani kan ci gaban da ake samu wajen gyaran manyan wuraren samar da ruwa a jihar.

Ya ce gidan samar da ruwa na Challawa, wanda aka tsara zai samar da kusan kashi 51 cikin 100 na ruwan da ake buƙata a birnin Kano, na daga cikin wuraren da ake aikin farfaɗowa, tare da madatsun ruwa na Tamburawa da Goron Dutse.

Dr. Dahiru ya ce wasu tsare-tsaren samar da ruwa da suka shafe shekaru ba sa aiki yanzu suna dab da komawa aiki yadda ya kamata, sakamakon gyare-gyaren da ake yi ƙarƙashin jagorancin Gwamna Abba Kabir Yusuf.