Yanzu haka kwamitin ganin wata na Fadar mai alfarma sarkin Musulmi Alhaji Muhammad Sa’ad Abubakar III, ya buƙaci al’ummar musulmin ƙasar nan da su fara duban jinjirin watan Shawwal, daga gobe Litinin, 8 ga watan Afrilun, 2024 da ake ciki.

Bayanin hakan na ƙunshe ne ta cikin wata sanarwa da kwamitin ya fitar a yammacin yau Lahadi a jihar Sokoto.

Sanarwar ta ce, duk wanda ya ga watan Shawwal, ya sanarwa Mai Gari ko Hakimi mafi kusa wanda kuma zai sanar har zuwa fadar Sarkin Musulmi.

Har ila yau, fadar Sarkin musulmin ta kuma bayar da lambobin waya waɗanda mutane za su yi amfani da su wajen ba da rahoton ganin watan Sallah ga fadar Sarkin musulmin, kamar yadda kafar yaɗa labarai ta BBC ta rawaito.

Malamar addinin musulunci dake nan Kano Malama Fatima Ahmad Tsakuwa, ta shawarci mata da su ƙara himma wajen kula da tarbiyyar ƴaƴansu, tare da kuma zaburar da su mahimmancin yin addu’a a cikin wannan wata na Ramadana, domin rabauta da rahamar Ubangiji S.W.T.

Malama Fatima Ahmad Tsakuwa, ta bayyana hakan ne yayin taron bita ta musamman da gidauniyar Bango Charity Foundation ƙarƙashin Malama Fatima Yusif Mai tama, wanda gidauniyar ta shirya wa Mata, da bitar ta shafi watan Azumin Ramadana, akan yadda iyaye matan za su kula da ƴaƴan su, da ya gudana a ofishin ƙungiyar dake unguwar Sharaɗa a Kano.

Wakiliyar tashar Dala FM Kano, ta rawaito cewa malama Fatima Tsakuwa ta ce akwai buƙatar iyayen su ƙara lura da tarbiyyar ƴaƴansu, tare da yawaita karatun Al-kur’ani mai girma domin rabauta da falala a wajen Allah S.W.T.

Fitaccen malamin addinin musuluncin nan Sheikh Abubakar Kabiru Ibrahim, babban malami na Madabo, ya ja hankalin al’ummar Musulmi, da su kame daga saɓawa Ubangiji S.W.T, yayin watan Azumin Ramadan, domin gujewa fushin sa.

Sheikh Abubakar babban malami na Madabo, ya bayyana hakan ne yayin bikin saukar karatun Al-kur’ani mai girma, na makarantar Huzaifatu Yamani Littahafizul Qur’an Wattarbiyya Al-Islamiyya, ta gudanar karo na uku, na ɗalibai 103, yayin da suka kasance Maza 36, Mata 67, da ta gudanar cikin unguwar Ƙofar Ruwa dake ƙaramar hukumar Dala, a ranar Asabar.

Malamin ya kuma ce akwai buƙatar al’ummar Musulmi, su dage da yawaita karatun Al-kur’ani mai girma, tare da komawa ga Ubangiji S.W.T, tare da salatin Ma’aiki S.A.W, inda ya kuma yi kira ga ƴan kasuwa da su sauƙaƙa wa al’umma domin samun sauƙi daga cikin halin matsin rayuwar da suka samu kansu a ciki.

Da yake nasa jawabin shugaban makarantun na Huzaifatu Yamani a jihar Kano Mallam Anas Muhammad Madabo, ya ce kasancewar makarantun Islamiyya ba su da gata a wajen wasu mutane, sai dai a wajen Ubangiji S.W.T, akwai buƙatar masu hali su shigo wajen tallafawa domin samun damar shayar da ɗalibai ingantaccen Ilmi.

“Iyaye yadda ku ke nuna halin ko in kula da karatun ƴaƴan ku musamman wajen rashin turo su makaranta a kan lokaci, da ƙarancin biyan kuɗin makaranta sai kun dage domin ta haka ne zaku rinƙa ƙara mana ƙwarin gwiwa wajen koyar da ƴaƴan naku, “in ji Mal. Anas Madabo”.

Wakilinmu Hassan Mamuda Ya’u ya rawaito cewa, a nasa ɓangaren shugaban makarantar da ɗaliban suka yi saukar a ƙofar ruwa Mallam Abdullahi Sa’ed Umar, shawartar ɗalibai ya yi da su ƙara himma wajen neman Ilmin addinin da na zamani, domin zama ababen koyi a tsakanin al’umma.