Manyan Labarai
Gwamnan Kano ya ƙaddamar da tallafin kayan abinci da gidauniniyar Dangote za ta rabawa mutane
Gwamnan jihar Kano Injiniya Abba Kabir Yusuf, ya jagoranci ƙaddamar da rabon tallafin kayan abinci da gidauniniyar Dangote Foundation za ta rabawa al’ummar kasar nan, domin rage musu wani raɗaɗin rayuwa da suke fuskanta.
Da yake ƙaddamar da rabon tallafin a gidan gwamnati, Gwamna Abba Kabir Yusuf, ya yi kira ga kwamitin da za su gudanar da rabon kayan abincin su zamo masu gaskiya da rikon amana, tare da tabbatar da tallafin ya isa ga mabuƙatan da aka tanadi abincin domin su, su samu yadda ya dace.
Aƙalla dai mutane dubu dari da ashirin ne za su amfana da tallafin kayan abincin a jihar Kano (120), waɗanda suka hadar da masu kananan karfi, da kuma masu bukata ta musamman irin su masu larurar Ƙafa, da masu lalurar Ido, da sauransu.
Injiniya Abba Kabir Yusuf ya kuma ce tuni tallafin kayan abincin ya isa ga ƙananan hukumomin Kano 44.
“Mun gamsu bisa tsarin da gidauniyar ta Dangote tayi na shigar da dakarun hukumar Hisbah cikin tsarin rabon tallafin abincin, da kuma shuwagabannin ruko na kananan hukumomi 44, Muna fatan cewa za su tsaya kan adalci da gaski yayin gudanar da rabon kayan abincin, “in ji Gwamnan”.
Da yake gabatar da tallafin, Alhaji Aliko Dangote, ya ce mutane miliyan daya ne za su amafana da tallafin buhunan shinkafa da Gero, guda Goma-goma daga dukkanin jihohin kasar nan har da babban birnin tarayya Abuja.
Ɗangote, ya kuma kara da cewar Gidauniyar ta dauki gaɓarar tallafawa al’ummar kasar nan ne da kayan abinci tun lokacin da kasar nan ta tsintar kanta a cikin halin annobar cutar nan ta Covid 19, tun a shekarar 2019, har zuwa yanzu, inda ya ce gidauniyar ba a nan ta tsaya ba tana tallafawa a bangaren Lafiya da Ilimi.
Wakilinmu na fadar Gwamnatin kano Abba Haruna Idris ya rawaito cewa, Injiniya Abba Kabir Yusuf, ya kuma godewa Alhaji Aliko Dangote, bisa samar da wannan tallafi, musamman a wannan yanayi na tsadar rayuwa da ake fuskanta tare da yin Kira ga mawadata da su yi koyi da irin wannan abin Alkhairi, domin samun gwaggwaɓan lada a wajen Ubangiji S.W.T. kamar yadda wakilinmu na fadar Gwamnatin Kano Abba Haruna Idris ya rawaito mana.
Kungiyar ƙwadago ta ƙasa NLC, ta shirta gudanar da zanga-zanga ta kasa a ranar 4 ga watan Fabrairu mai kamawa kan karin kudin kira da Data dana tura sakonni da gwamnatin tarayya ta yi.
Ƙungiyar dai ta amince da yin zanga-zangar ne a yayin taron shugabannin NLC na kasa da ke gudana, a wani ɓangare na nuna takaicin ta kan halin da ƴan Najeriya suka samu kansu a ciki, kamar yadda jaridar The Nation ta ruwaito.
Matakin dai wani jan kunne ne ga gwamnati cewa ma’aikata za su ci gaba da kalubalantar karin kudin saboda yanayin talauci da zai kara jefa al’ummar Najeriya.
Da yake jawabi akan batun shugaban ƙungiyar ƙwadagon na ƙasa Joe Ajaero, ya ce, ƙarin kiran da na Data da kuma na tura saƙonni da aka yi za a iya kiran sa da cin zarafin ma’aikata, kuma tauye wal-walar su.
A cewar sa, ƙarin ya zo ne a dai-dai lokacin da ƴan Najeriya ke fuskantar halin matsayin rayuwa bisa durƙushewar tattalin arziƙi.
Majalisar dokokin jihar Kano ta amince da karatu na biyu kan kudurin dokar kafa Rundunar tsaro, da ta hukumar samar da wutar lantarki dukkanin su mallakin gwamnatin Kano.
Da yake karanto ƙudurin dokokin, shugaban masu rinjaye na majalisar Lawan Hussaini Dala, ya ce samar da dokokin domin kafa Ma’aikatun biyu zai inganta tattalin arzikin jihar Kano.
Lawan Hussaini, ya kuma ce idan akayi la’akari da yadda gwamnatocin kudancin Najeriya suka samar da Rundunonin tsaro mallakin su irin su Amotekum domin inganta tsaron cikin gida, ya zama wajibi gwamnatin jihar Kano ma ta samar da nata hanyoyin tsaron.
A cewar sa, “Amincewa da karatu na biyu a kudurin dokar kafa hukumar samar da wutar lantarki mallakin gwamnatin Kano ya biyo bayan sahalewar da gwamnatin tarayya ta yi wa jihohin Najeriya, na su samar da hasken wutar lantarki mallakin su domin haɓaka tattalin arziki, “in ji shi”.
Wakilin mu na majalisar dokokin Kano Umar Abdullahi Sheka ya rawaito cewar, majalisar ta ce jami’an rundunar tsaron da za’a samar suna da ikon ɗaukar makamai ƙirar gida domin su kare kansu, sannan suna da ikon kama mai laifi tare da mika shi ga jami’an ƴan sanda domin gurfanarwa a gaban kotu, ba tare da jira ba.
An yi zargin wasu fusatattun matasa sun bankawa wani baburin Adai-daita Sahu Wuta, tare da yunƙurin saɓawa masu baburin kamanni, domin huce haushin su akan su.
Tunda fari dai an zargi masu baburin ɗan sahun (keke Napep) da satar dabbobin mutane a Maƙabartar unguwar Maikalwa da ke ƙaramar hukumar Kumbotso a Kano, lamarin da fusattun matasan suka ɗauki mummunan matakin akan su.
Wasu shaidun gani da ido sun shaidawa wakilinmu Nasir Khalid Abubakar cewar, an ƙona baburin ne a yammacin Asabar, tare da yunƙurin far wa masu babur ɗin daga bisani jami’an tsaro suka kai ɗauki tare da tafiya da matasan da ake zargi da satar dabbobin.
Wakilin tashar Dala FM Kano, ya ruwaito cewa, bayan faruwar lamarin ne kuma wasu matasa a yankin suka yi ƙoƙarin kashe wutar da ke ci a baburin Adai-dai Sahun, da zummar idan ta mutu su ɗebi kayayyakin da basu ƙone ba a matsayin Ganima, sai dai jami’an ƴan sanda suka tarwatsa su.
Akan batun mu so jin ta ɓangaren rundunar ƴan sandan jihar Kano, sai dai haƙar mu bata cimma ruwa ba, amma za aji mu da ita da zarar ta magantu.
-
Nishadi5 years agoIna neman mijin aure – Rayya
-
Labarai4 years agoHamisu Breaker ya kai kan sa wajen ‘yan sanda
-
Nishadi5 years agoMansura Isah ta yi kaca-kaca da Sadiya Haruna
-
Manyan Labarai5 years agoKAROTA: An baiwa Baffa Babba wa’adin kwanaki bakwai
-
Labarai5 years agoAuren dan Panshekara da ba Amurkiya ya samu cikas
-
Lafiya3 years agoRahoto: An gano wani gida da ake gini da takardun Kur’ani da Alluna
-
Manyan Labarai5 years agoSabuwar damfarar da ta fito a Kano
-
Nishadi5 years agoAn gano daliban da Adam Zango ya dauki nauyin karatun su