Labarai

Binne gawa: Matashi ya dauke wa mutum waya a makabarta

Published

4 years ago

13/08/2020

A na zargin wani matashi mai suna Abdullahi Idris Sudawa mai shekaru 40, da satar waya a na tsaka da binne gawa a makabartar Abbatuwa da ke Kofar Mazugal.

Matashin dai al’ummar da su ka zo binne gawar sun yi nasarar kama shi ne bayan ya yanka aljihun wani mutum ya na yunkurin satar wayar lokacin da a ke binne gawa.

Gidan radiyon Dala ya zantawa da Abdullahi Idris inda ya bayyana yadda al’amarin ya faru.

Ya ce, “Waya ce na dauka kuma na bai wa mai ita kayar sa, a cikin makabarta ne abun ya faru, ban san mai ita ba, amma kuma na ba shi kayan shi, ba ‘yan unguwar mu ba ne, tsayawa na yi addu’a… Gaskiya na fada na dauka na kuma bayar, ban san kudin wayar ba, kuma da yardar Allah na yi na farko na yi na karshe, idan na sata a kwai wanda na ke kai wa a Wapa ya siya… Kauyuka na ke zuwa yin sata, idan mutum ya na tafiya in saka masa hannu a aljihun gefe”. A cewar Abdullahi Idris

Suma dai wasu daga cikin wadanda su ka halarci binne gawar kuma abun ya faru a kan idanunsu sun yi mana karin bayani.

“Sunana Zahradden Shu’aibu Haruna. Mun je makabartar Abbatuwa mun ajiye baburan mu mun shiga ciki sai a ka kama wasu sun yanka aljihun mutane su na kokarin daukar mu su wayoyi, sai mu ka fito fito waje, na zo zan dauki babur di na na gan shi a bude, abun ya razana ni, wannan abun ya zama ruwan dare, a dauke wa mutane abun hawa”.

“Sunana Isah Rabi’u Ahmad Goran dutse. Daya daga cikin wadanda su ka kama gawa za’a saka a kabari wayar sa ta fada cikin kabari ya zaro wayar ya miko a rike masa, a wajen ba’a san wanda ya karbi wayar ba saboda rashin imani na al’umma, sannan a ka samu mutane an yanka masu aljihu, mu ka fito mu ka ga an bude kan baburan mu”. A cewar ganau

Shugaban ‘yan bijilante na yankin Kofar Mazugal, Danlami Kwamanda ya ce, “Abun ya ba ni mamaki, rashin tsoron Allah irin na mutane, a cikin makabarta an zo sa gawa, amma barayi su zo suna sata a makabarta, ka duba yadda kan babura su ke a bude, barawon nan ba shi kadai ba ne”. Inji Danlami Kwamanda

Wakilin mu Abubakar Sabo ya rawaito cewar, Danlami Kwamanda ya kuma ce, yanzu matakin da za su dauka sai sun ga karshen wannan abun, domin za su kai shi ga hukuma a dauki matakin.

Labarai

Sarkin Kano Khalifa Muhammadu Sunusi na biyu, ya naɗa Ɗan Sa a matsayin Chiroman Kano.

Published

1 week ago

15/11/2024

Hassan Mamuda Ya'u

Mai martaba sarkin Kano Dakta Khalifa Muhammadu Sunusi na biyu, ya buƙaci dukkanin hakimansa da ke faɗin jihar nan da su mayar da hankali wajen gudanar da aikin su bisa gaskiya da riƙon Amana.

Sarkin ya bayyana hakan ne a lokacin da ya naɗa DSP Aminu Lamiɗo Sunusi a matsayin Chiroman Kano, kuma babban ɗan fadar Sarki, yau Juma’a a fadar sa.

Khalifa Muhammadu Sunusi na biyu, ya ce ya naɗa DSP Aminu Lamiɗo Sunusi a matsayin Chiroman Kano, ne bisa cancanta da zuminci da kuma gogewarsa akan aikinsa na ƴan sanda, tare kuma da taimakawa al’umma da yake yi a koda yaushe.

Mai martaba sarkin ya kuma taya Chiroman Kano, murna bisa wannan naɗin da aka yi masa, tare da fatan zai zamo jakada na gari musamman wajen samar da cigaban Al’umma da kuma masarautar Kano.

Wakilinmu na masarautar Kano Shamsu Da’u Abdullahi ya rawaito cewa taron naɗin ya samu halartar gwamnan jihar Kano Injiniya Abba Kabir Yusuf, da sarakunan gargajiya daga wasu daga cikin jahohin ƙasar nan.

Labarai

Za mu magance matsalolin da hukumar Hisbah ta Dala ke fuskanta – Shugaban ƙaramar hukumar Dala

Published

2 weeks ago

11/11/2024

Hassan Mamuda Ya'u

Ƙaramar hukumar Dala ta ce za ta yi bakin ƙoƙarin ta wajen magance matsalolin da hukumar Hisbah ta ƙaramar hukumar Dala ke fuskanta, domin ƙara ƙarfafa musu gwiwa wajen gudanar da ayyukan al’umma.

Shugaban ƙaramar hukumar Suraj Ibrahim Imam ne ya bayyana hakan, a lokacin da jami’an hukumar Hisbah ta ƙaramar hukumar Dala, suka ziyarce shi a ofishinsa, domin taya shi murnar nasarar cin zaɓe da suka yi, tare da sanar dashi halin da hukumar Hisbar ke ciki a halin yanzu.

“Daga cikin ƙalubalen da zan yi ƙoƙarin magance wa akwai samar da ruwa da wutar lantarki da kuma samar wa hukumar kayan aiki, bisa yadda suke fama da rashin su, “in ji Suraj Imam”.

Shugaban ƙaramar hukumar ta Dala Sura ya kuma yi kira ga babban kwamandan hukumar Hisbah ta jihar Kano Sheikh Aminu Ibrahim Daurawa, da ya ƙara kulawa da walwalar hukumar ta ƙaramar hukumar Dala bisa ƙalubalen da suke fuskanta.

Da yake nasa jawabin kwamandan hukumar Hisbah ta ƙaramar hukumar Dala Mallam Umar Bala Muhammad, ya ce sun ziyarci shugaban ƙaramar hukumar ne domin taya shi murnar nasarar cin zaɓe da kuma sanar da shi halin da hukumar ke ciki, domin haɗa ƙari da ƙarfe wajen magance ƙalubalen da suke fuskanta.

Wakiliyarmu Hadiza Balanti ta rawaito cewa Mallam Umar Bala ya kuma ƙara da cewa a shirye hukumar hisbar ta ƙaramar hukumar Dala take wajen gudanar da ayyukan al’umma babu gajiyawa.

Labarai

Mun dakatar da karɓar kuɗin haraji a Fagge har sai an kammala bincike – Shugaban Ƙaramar hukumar Fagge

Published

4 weeks ago

29/10/2024

Hassan Mamuda Ya'u

Ƙaramar hukumar Fagge ta dakatar da dukkannin harkokin karɓar haraji har zuwa lokacin da za’a kammala bincike, don tabbatar da cewa bangaren harajin nayin aiki bisa doka domin ciyar da ƙaramar hukumar gaba.

Shugaban ƙaramar hukumar ta Fagge Salisu Usman Masu ne ya bayyana hakan yayin zantawar sa da tashar Dala FM Kano, a safiyar yau Talata.

Salisu Usman ya kuma bayyana cewar duk filotan da aka yanka aka sayar ko aka bayar ba bisa ƙa’ida ba shima an soki shi.

Shugaban ya kuma yi kira ga ƴan kwangila waɗanda suka watsar da ayyukan da aka basu da su dawo bakin aiki ka’in da na’in.

A cewar sa, “Na fahimci irin kalubalen da ke damun al’umma a ɓangaren lafiya a ƙaramar hukumar mu ta Fagge; kuma za mu yi ƙoƙarin samar da kayan aiki domin magance matsalar, “in ji shi”.

Masu ya kuma bayyana cewar ƙaramar hukumar ta Fagge za ta inganta harkar ilimi da tsaro, da Lafiya, inda kuma yi kira ga duk wani mai kaunar ci gaban karamar hukumar Fagge da ya taho a hada hannu ko da shawara zai bayar dan ciyar da karamar hukumar gaba.