Labarai

Abun takaici ne matasan mu su rinka shan Giya da Wiwi – Limami

Published

3 years ago

28/05/2021

Limamin masallacin Manzon Allah Sallallahu Alaihi Wasallama dake birnin Madina, Sheikh Salah bn Muhammad ya ce abun takaici ne yadda matasa ke jefa kan su cikin harkokin shaye-shayen miyagun kwayoyi ciki harda Giya da tabar Wiwi.

Sheikh Salah, ya bayyana hakan ne ta cikin hudubar shi ta juma’a da ya gabatar a masallacin.

Ya ce,”Matasa da su yi riko da mutuncin su, abin takaici shi ne samun matasan mu wajan shaye-shayen kwayoyi da Giya tare da tabar Wiwi da sauran abubuwan da ke janyo wa matasan kaskanci”. Inji Sheikh Salah.

Ya kara da cewar”Wadannan shaye-shayen ya na hana Matasa yin ayyukan alkhairi, ya na kuma sanya matasa aikata munanan halaye, ya lalata tunanin su, ya na kuma haifar da fadace-fadace a cikin al’umma. Abin da ke kawar da hankali ya na jawo mutum ya zamanto ba shi da wani amfani a cikin al’umma, har ma wani lokacin ka ga mutum ya koma aikata halaye irin na dabbobi har ta kai wani lokacin ka samu mutum ya yi kokarin kashe kansa saboda illar maye. Shaye-shayen yana janyo ka samu matasan mu sun rabu da abokai na gari ya gayyato munanan abokai da kan shi, wani lokacin za ka ga iyayen mai shaye-shaye su na rabuwa da shi, al’umma ma gaba ɗaya su na rabuwa da ɗan shaye-shaye”. A cewar Salah.

Wakilin mu Umar Yakubu Ilu ya rawaito mana cewa, Sheikh Salah bn Muhammad Albudair ya ja hankalin matasa cewa da su guji wadannan kayan shaye-shayen da shaidan ne ya ke farin ciki shan su, ya kuma tsoratar da Matasa cewa, Manzon Allah Sallallahu alaihi Wasallama ya La’anci mai shan giya da wanda ya ke siyar da ita.

Sannan ya roki Allah madaukakin sarki da ya tsairatar da Matasan mu mazan su da Matan su daga wannan mummunan halin, wanda ya ce bincike ya tabbatar da cewa a kowace shekara a na samun miliyoyin mutane suna fadawa cikin wannan mummunan halin.

Labarai

Sarkin Kano Khalifa Muhammadu Sunusi na biyu, ya naɗa Ɗan Sa a matsayin Chiroman Kano.

Published

1 week ago

15/11/2024

Hassan Mamuda Ya'u

Mai martaba sarkin Kano Dakta Khalifa Muhammadu Sunusi na biyu, ya buƙaci dukkanin hakimansa da ke faɗin jihar nan da su mayar da hankali wajen gudanar da aikin su bisa gaskiya da riƙon Amana.

Sarkin ya bayyana hakan ne a lokacin da ya naɗa DSP Aminu Lamiɗo Sunusi a matsayin Chiroman Kano, kuma babban ɗan fadar Sarki, yau Juma’a a fadar sa.

Khalifa Muhammadu Sunusi na biyu, ya ce ya naɗa DSP Aminu Lamiɗo Sunusi a matsayin Chiroman Kano, ne bisa cancanta da zuminci da kuma gogewarsa akan aikinsa na ƴan sanda, tare kuma da taimakawa al’umma da yake yi a koda yaushe.

Mai martaba sarkin ya kuma taya Chiroman Kano, murna bisa wannan naɗin da aka yi masa, tare da fatan zai zamo jakada na gari musamman wajen samar da cigaban Al’umma da kuma masarautar Kano.

Wakilinmu na masarautar Kano Shamsu Da’u Abdullahi ya rawaito cewa taron naɗin ya samu halartar gwamnan jihar Kano Injiniya Abba Kabir Yusuf, da sarakunan gargajiya daga wasu daga cikin jahohin ƙasar nan.

Labarai

Za mu magance matsalolin da hukumar Hisbah ta Dala ke fuskanta – Shugaban ƙaramar hukumar Dala

Published

2 weeks ago

11/11/2024

Hassan Mamuda Ya'u

Ƙaramar hukumar Dala ta ce za ta yi bakin ƙoƙarin ta wajen magance matsalolin da hukumar Hisbah ta ƙaramar hukumar Dala ke fuskanta, domin ƙara ƙarfafa musu gwiwa wajen gudanar da ayyukan al’umma.

Shugaban ƙaramar hukumar Suraj Ibrahim Imam ne ya bayyana hakan, a lokacin da jami’an hukumar Hisbah ta ƙaramar hukumar Dala, suka ziyarce shi a ofishinsa, domin taya shi murnar nasarar cin zaɓe da suka yi, tare da sanar dashi halin da hukumar Hisbar ke ciki a halin yanzu.

“Daga cikin ƙalubalen da zan yi ƙoƙarin magance wa akwai samar da ruwa da wutar lantarki da kuma samar wa hukumar kayan aiki, bisa yadda suke fama da rashin su, “in ji Suraj Imam”.

Shugaban ƙaramar hukumar ta Dala Sura ya kuma yi kira ga babban kwamandan hukumar Hisbah ta jihar Kano Sheikh Aminu Ibrahim Daurawa, da ya ƙara kulawa da walwalar hukumar ta ƙaramar hukumar Dala bisa ƙalubalen da suke fuskanta.

Da yake nasa jawabin kwamandan hukumar Hisbah ta ƙaramar hukumar Dala Mallam Umar Bala Muhammad, ya ce sun ziyarci shugaban ƙaramar hukumar ne domin taya shi murnar nasarar cin zaɓe da kuma sanar da shi halin da hukumar ke ciki, domin haɗa ƙari da ƙarfe wajen magance ƙalubalen da suke fuskanta.

Wakiliyarmu Hadiza Balanti ta rawaito cewa Mallam Umar Bala ya kuma ƙara da cewa a shirye hukumar hisbar ta ƙaramar hukumar Dala take wajen gudanar da ayyukan al’umma babu gajiyawa.

Labarai

Mun dakatar da karɓar kuɗin haraji a Fagge har sai an kammala bincike – Shugaban Ƙaramar hukumar Fagge

Published

4 weeks ago

29/10/2024

Hassan Mamuda Ya'u

Ƙaramar hukumar Fagge ta dakatar da dukkannin harkokin karɓar haraji har zuwa lokacin da za’a kammala bincike, don tabbatar da cewa bangaren harajin nayin aiki bisa doka domin ciyar da ƙaramar hukumar gaba.

Shugaban ƙaramar hukumar ta Fagge Salisu Usman Masu ne ya bayyana hakan yayin zantawar sa da tashar Dala FM Kano, a safiyar yau Talata.

Salisu Usman ya kuma bayyana cewar duk filotan da aka yanka aka sayar ko aka bayar ba bisa ƙa’ida ba shima an soki shi.

Shugaban ya kuma yi kira ga ƴan kwangila waɗanda suka watsar da ayyukan da aka basu da su dawo bakin aiki ka’in da na’in.

A cewar sa, “Na fahimci irin kalubalen da ke damun al’umma a ɓangaren lafiya a ƙaramar hukumar mu ta Fagge; kuma za mu yi ƙoƙarin samar da kayan aiki domin magance matsalar, “in ji shi”.

Masu ya kuma bayyana cewar ƙaramar hukumar ta Fagge za ta inganta harkar ilimi da tsaro, da Lafiya, inda kuma yi kira ga duk wani mai kaunar ci gaban karamar hukumar Fagge da ya taho a hada hannu ko da shawara zai bayar dan ciyar da karamar hukumar gaba.