5:54 Daliban Jamiar Yusuf Maitama Sule dake nan Kano tare da hadin gwiwar sauran daliban Jami’oi daban daban dake sassa daban-daban na fadin kasar nan tare da hadin kan wasu ‘yan kungiyoyi suka gudanar da wata Zanga-zangar lumana a cikin akwaryar birnin Kano.

Zanga Zangar dai ta samo asali ne bisa zargin wata daliba mai suna Zainab Habibu Aliyu ‘yar asalin jihar Kano da Kasar Saudiyya ta kama ta da kwaya a cikin Jakarta, zanga-zangar sun yi ta ne har zuwa gidan Gwamnatin Jihar Kano domin kai koken su Inda suka sami tarba daga Sakataren Gwanatin Jihar Kano Alhaji Usman Alhaji a madadin Gwamnan Kano Dr.Abdullahi Umar Ganduje daga nan su ka wuce zuwa ofishin jakadancin kasar Saudiyya dake jihar Kano.

A wani cigaban kuma tuni kasar Saudiyya ta saki dalibar Zainab Habiba Aliyu aka kuma mika ta zuwa ofishin jakadancin Nijeriya dake kasar Saudiyya bayan da gwamnatin tarayya ta shiga cikin lamarin inda shugaban kasa Muhammadu Buhari ya umarci shugaban alkalin alkalai Tanko Muhammad da ya hanzarta shiga cikin lamarin.

Kungiyar likitocin dabbobi ta kasa reshen jihar Kano, ta ce ana iya daukar cutar dabbobin gida har idan suna dauke da wata cuta musamman ma mai saurin yaduwa.

Mataimakin shugaban kungiyar, Dr Aminu Bello Hanga ne ya tabbatar da hakan yayin ganawarsa da gidan rediyon Dala, ya na mai cewa ”kamata ya yi mutane da su rinka taka tsantsan da dukannin nau’ikan dabbobin da su ke mu’amala dasu musamman ma a lokacin da suka ga wani sauyin yanayi ga dabbobin su”.

Tsohon shugaban makarantar Kwalejin Rumfa dake nan Kano, Malam Tijjani Muhammad Adam, ya yi kira ga tsofaffin dalibai, da su ci gaba da hada kai tare da samarwa makarantun da suka kammala hanyoyin ci gaba.

Malam Tijjani Muhammad Adam, ya yi wannan kiran ne yayin taron tsofaffin daliban makarantar Kwalejin Rumfa aji na shekarar 1998, yayin taron an karrama tsofaffin ‘ya’yan kungiyar wanda suka hada da Dr. Ashir T. Inuwa na sashin koyar da aikin jarida a jami’ar Bayero da ya kammala digirinsa na uku, da kuma Dr. Musbahu Haruna Ahmad, wanda shima ya zama kwararre a bangaren kwakwalwa da laka a Asibitin koyarwa na Malam Aminu Kano.

Mataimakin babban Sufetan ‘yansanda na kasa mai kula da shiyya ta daya, AIG Danbature, ya bude dakin taro na rundunar ‘yansanda ta jihar Kano wanda kwamishinan ‘yansandan jihar, CP Muhammad Wakili ya sabunta dakin taro a shalkwatar rundunar dake unguwar Bompai.

Taron wanda ya sami halartar manyan jami’an ‘yansanda da kanana da sauran al’ummar gari, inda aka sanyawa dakin taron suna IGP Muhammad Abubakar Adamu, wannan dai na daya daga cikin ayukan da CP Muhammad Wakili yake gudanarwa a jihar Kano bawai iya akan kwaya ya tsaya ba.

Mai Magana da yawun ma’aikatan gidajen yari na jihar Kano, DSP Musbahu Lawan Kofar Nassarawa, yace sashi na dari uku da casa’in da tara na kundin tafikar da tsarin aikin ma’aikatan gidan yari ya baiwa kowane dan kasa damar kai ziyara tare da bada gudunmawa ga dauraru.

DSP Musbahu, ya ce ”a don haka kowa na da damar kai gudunmawarsa ga daurarru tare da kai masu ziyara a fadin kasar nan”.

Limamin massalacin juma’a na Khulafa’urrashidin dake unguwa uku ‘yan awaki, Malam Muhammad Sani Umar Arqam, ya gargadi ‘yan kasuwa da su rinka sassauta farashi don saukakawa al’umma musamman ma a watan Ramadan mai karatowa nan da wasu ‘yan kwanaki.

Ta cikin shirin shari’a a aikace na nan gidan rediyon Dala, a nasa bangaren Malam Yusuf Abdulrahman Yusuf Uba Mandawari wanda ya kasance a cikin shirin, ya bayyana cewa ”matsalar tsaro da ake fama da ita, na da nasaba da talaucin da mutane suka tsinci kan su a ciki”.

Wani kwarraren likita dake aiki a asibitin koyarwa na Aminu Kano, Dr Ibrahim Danjummai, ya shawarci masu dauke da cutar ciwon sukari dasu kaucewa cin abubuwan da za su rinka tayar da masu da cutar su musamman ma cin kitse.

A zantawarsa da gidan rediyon Dala, Dr Danjummai, ya kuma ce ”wadanda basu da wannan cuta sai sun kasance masu motsa jiki akai-akai don gudun kamuwa da cutar ciwon suga”.