Labarai

Kotu ta bada umarnin bude asusun hukumar Hisbah dake Kano

Published

3 months ago

04/02/2024

Hukumar Hisba ta Jihar Kano ta ce kotu ta bayar da umarnin a buɗe asusun ajiyar bankinta da aka rufe a kwanakin bayan nan.

Bayanin hakan ya fito ne ta cikin wata sanarwa da mai magana da yawun ta Auwalu Ado Sheshe ya fitar, inda ta ce an bude asusun ne bayan da babban kwamandan Hisbar Sheikh Aminu Ibrahim Daurawa ya umarci Babban Daraktan hukumar Alhaji Abba Sa’id Sufi, da ya nemi ba’asi akan dalilin rufe asusun Bankin hukumar.

Ya ce bayan daukar matakin ne babban daraktan ya tuntubi ma’aikatar shari’a domin samun shawarwari akan lamarin.

A wata hira da ya yi da manema labarai, Sheikh Aminu Daurawa ya ce “an samu kuskure ne, umarnin kotun cewa ya yi a rufe asusun nasu na iyakar kuɗi da ba za su shiga ko fita ba, ma’ana duk abin da ya haura dubu 800 ba zai fita daga asusun nasu ba.

Daga baya aka buɗe wa Hisba asusun nata, tare da neman afuwar da bankin ya yi ga hukumar, kamar yadda jaridar Idongari.ng ta rawaito

Rahotanni sun bayyana cewa da yake jawabi a cikin wani bidiyo, Daurawa ya ce an rufe asusun Hisbah ne sakamakon wani sumame da hukumar ta yi a wani otal dake Sabon Gari a shekarar 2019, kan haka kungiyar masu Otal suka gurfanar da hukumar a gaban kotu, a cewar sanarwar.

Sanarwar hukumar ta ce duk da wannan matakin da aka ɗauka kanta, ba zai kashe mata gwiwa ba wajen gudanar da aikinta na umarni da kyakkyawa da hani da mummuna ba.

Labarai

Ku guji zubar da Shara barkatai a muhallan ku – Gwamnatin Kano

Published

30 mins ago

03/05/2024

Hassan Mamuda Ya'u

Gwamnatin jihar Kano ta gargadi al’umma da su kaucewa zubar da shara a wuraren da ba’a tanade su ba, domin kaucewa yawaitar samun cutuka a tsakanin al’umma, duba da yadda ake ci gaba da tunkarar lokacin Damuna.

Shugaban hukumar kwashe shara da tsaftar muhalli ta jihar Kano Ambasada Ahmadu Haruna Zago, ne ya bayyana hakan a lokacin da yake sanya ido kan aikin kwashe sharar da ke unguwar Zango hauran gadagi bayan Festival.

Ya ce duba da yadda Damuna ke ci gaba da tunkarowa, akwai bukatar al’umma su fahimci cewa zubar da shara barkatai ka iya haifar da cututtuka daban-daban ga iyalan su, musamman ma kasancewar sharar da ke unguwar ta Zango bayan Festival, tana tsakiyar gidajen al’umma ne da kasuwa da kuma makaranta.

Nazifi Mohammed Usman mai Duniya, da Mohammed Ibrahim wato Halifa mai Gas mazauna unguwar ta Zango ne, sun ce tarin sharar a cikin unguwar su babban ƙalubale ne a gare su, domin kuwa taruwar da tayi har ta kan shiga cikin makarantar yankin su.

Shugaban hukumar kwashe sharar Ahmadu Zago, ya kuma sha alwashin yin duk mai yiwuwa wajen tsafta ce birnin Kano, wajen kwashe shara daga kowane yankin, domin gudun faruwar ambaliyar ruwa sanadin sharar da ka toshe magunan ruwa a jihar Kano.

Labarai

NAHCON ta sanya ranar fara jigilar maniyyata aikin hajjin bana zuwa Saudiyya

Published

1 day ago

02/05/2024

Hassan Mamuda Ya'u

Yanzu haka hukumar Aikin Hajji ta ƙasa NAHCON, ta 15 ga watan nan na Mayun 2024, a matsayin ranar da za’a fara jigilar maniyyata aikin hajjin bana, zuwa ƙasa mai tsarki.

Bayanin hakan ya fito ne ta bakin shugaban hukumar ta NAHCON, Jalal Ahmad Arabi, a wajen taron masu ruwa da tsaki kan aikin Hajji da Umrah, da ya gudana yau Alhamis birnin tarayya Abuja.

“Maniyyata kimanin 65,500 ne za su sauke Farali daga ƙasar nan a ƙasa mai tsarki; za su shafe aƙalla kwanaki huɗu domin yin ziyara a Madina kafin fara aikin Hajji, “in ji Arabi”.

Daga bisani shugaban hukumar aikin hajjin Jalal Ahmad Arabi, ya kuma bayyana cewa za ayi jigilar maniyyata aikin hajjin ne daga cibiyoyi 10 a faɗi ƙasar nan.