Manyan Labarai
Gwamnan Kano ya rantsar da sabbin Alƙalai a jihar
Yanzu haka gwamnan jihar Kano Injiniya Abba Kabir Yusif, ya rantsar da sabbin Alƙalai a matakan kotunan daban-daban na jihar ta Kano.
Hakan na zuwa ne ta cikin wata sanarwa da babban daraktan yaɗa labaran Gwamnan Sanusi Bature Dawakin Tofa ya fitar a yau Juma’a, da aka aikewa manema labarai.
Sanarwar ta ce Alƙalan da Gwamnan Kano ya rantsar sun haɗar da Alƙalan Babbar kotun Jiha guda tara (9), da kuma Alƙalan kotun ɗaukaka ƙara na shari’ar Musulunci guda uku (4), bayan da hukumar kula da sharia ta kasa (NJC) da kuma majalisar dokokin jihar Kano suka amince da naɗin nasu.
Haka kuma waɗanda aka naɗa a matsayin alƙalan babbar kotunan Jihar sune, Justice Fatima Adamu, Justice Musa Ahmad, Justice Hauwa Lawan, da Justice Farida Rabi’u Dan Baffa, da kuma Justice Musa Dahiru Muhammad.
Sannan kuma sauran su ne Justice Halima Aliyu Nasir, Justice Aisha Mahmud, Justice Adam Abdullahi, da kuma Justice Hanif Sunusi Yusuf.
A ɓangare guda kuma Alƙalan kotunan ɗaukaka ƙara na shari’ar Musulunci da aka naɗa sun haɗar da Khadi Muhammad Adam Kademi, da Khadi Salisu Muhammad Isah, sai kuma Khadi Isah Idris Sa’id, da kuma Khadi Aliyu Muhammad Ƙani.
Yayin da yake jawabi ga Alƙalan a wajen bikin rantsuwar da aka gudanar a ɗakin taro na Africa House dake gidan gwamnatin Kano, Gwamna Abba Kabir Yusuf, ya ce an yi naɗin ne a bisa cancanta, inda naɗin nasu ya zama shaida da ke nuna ƙwarewar su ta fuskar shari’a, dama jajircewarsu wajen tabbatar da adalci da kuma doka da oda.
Gwamnan Kano ya kuma ce, “Haƙƙin da kuke ɗauka yana da yawa, kuma tasirin hukuncin ku ya kai ko’ina; Wannan nauyi ne da ke buƙatar ba wai kawai ƙwarewar shari’a ba har ma da zurfin fahimta, tausayawa, da jajircewa wajen kiyaye muhimman ƙa’idoji waɗanda aka gina tsarin shari’ar mu a kansu, “in ji Abba Gida-gida”.
Gwamna Abba Kabir ya ci gaba da cewa tun da aka kafa gwamnatinsa ta amince da mafi yawan buƙatu daga bangaren shari’a da ke da alaka da ƙudirin gwamnatin sa na raba madafun iko da ‘yancin kan ɓangaren shari’a, kamar yadda jaridar GTR Hausa ta rawaito.
Daga bisani dai Abba Kabir ya kuma buƙaci Alƙalan da su yi aikin su cikin tsoron Allah, tausayawa da jajircewa wajen yin hidima tare da bayyana kyakykyawan fata a gare su dangane da Wannan sabon nauyi da ya hau wuyan su.
Rahotanni sun bayyana cewar bikin rantsuwar ya samu halartar babbar Alƙaliyar alkalan jihar Kano, Mai shari’a Dije Aboki, da kuma Grandi Khadi na Kano, Khadi Tijjani Yusuf Yakasai, da Alƙalai da sauran jiga-jigan dake fannin shari’a daga bangarori daban-daban na ciki da wajen jihar Kano.
Manta Sabo
Kotu ta hana duk wata kafar yada labarai yin labarin da ya shafi Auwalu Danladi Sankara da Taslim Baba Nabegu.
Babbar kotun jaha mai lamba 4 karkashin jagorancin mai Shari’a Usman Na Abba ta yi hani ga duk wasu Jami’an Ƴan sanda ko na duk wata hukuma ta daban daga gayyata ko tsangwama, ko kuma bincike ko kamawa, ta kowace siga ga kwamishinan ayyuka na musamman na jihar Jigawa Auwalu Ɗanladi Sankara.
Wannan dai na zuwa ne bayan da kotu ta wanke Auwalu Sankara daga zargin mu’amala ko alaƙa da juna tsakanin mai ƙara da Taslim Baba Nabegu har zuwa lokacin sauraran ƙarar.
Kotun ta kuma amince da rokon da wani lauya mai suna Barrister I.C Ekpinovi ya yi amadadin mai kara Auwalu Danladi Sankara wanda ya yi karar Nasiru Buba.
Mai karar ta bakin lauyansa ya bayyana wa kotun rokonsa inda ya roki kotun da ta dakatar da wanda ake kara ko dai shi da kansa ko kuma ƴan korensa daga ci gaba da yaɗa wata magana wadda wata babbar kotun Shari’ar Muslunci da ke Kano ta rufe.
Mai Shari’a Usman Na Abba ya ayyana cewar ko dai wanda aka yi kara ko yan korensa ko kuma wasu wakilansa, da a dai na yaɗa waccan magana har zuwa lokacin da kotun za ta saurari kowanne ɓangare.
Kotun ta ayyana cewar ta yi hani ga duk wata kafa ta yada labarai ko dai Rediyo ko Talabijin, ko shafukan sada zumunta da kafar Intanet da duk wata kafa wadda take iya sadar da labarai, daga yaɗa labaran da suka shafi Auwalu Ɗanladi Sankara da Taslim Baba Nabegu.
A ranar Talata ne dai gwamnan jihar Jigawa Mallam Umar Namadi ya bayyana mayar da Auwalu Ɗanladi Sankara muƙamin sa na Kwamishinan ayyuka na musamman a jihar, bayan da kotu ta wanke shi daga zargin da hukumar Hisbah ta Kano, ta yi masa kan zargin baɗala da wata matar aure.
Wakilinmu Yusuf Nadabo Isma’il ya ruwaito cewa kotun ta kuma sanya ranar 28 ga wannan watan na Nuwamba dan sauraron kowane ɓangare akan shari’ar.
Babbar kotun Shari’ar Muslunci mai zaman ta a kofar kudu ƙarƙashin jagorancin mai Shari’a Ibrahim Sarki Yola, ta sallami dakataccen kwamishina a jihar Jigawa, Auwalu Ɗanladi Sankara da Taslim Baba Nabegu.
Tun da farko kotun ce ta tura ofishin ƴan Sanda Shiyya ta ɗaya da ke jihar Kano, wato Zone 1, domin mukaddashin babban sifetan yansanda ya binciki zargin da ake wa Auwalu Danladi da Taslim Baba Nabegu, sakamakon korafin da wani mutum Mai suna Nasiru Buba ya yi, wanda ya zargi Auwalun da cewar suna yin mu’amalar da bata dace ba.
Cikin ƙunshin takaddar da muƙaddashin babban sifetan ƴansanda ya tura wa kotun ya bayyana cewar, hukumar Hisbah ta yi azarɓaɓi akan batun, kuma ya umarce su da su rinƙa yin aiki a bisa tsarin doka.
A zaman kotun na yau mai Shari’a Sarki Yola ya ayyana cewar babu tuhuma akan waɗanda ake zargin sakamakon yadda ƴan sanda suka gudanar da bincike, inda suka ce sun samu cewar maganar Jita-jita ce kuma Shari’a bata karɓar jita-jita.
Har ila yau, ma’aikatar Shari’a ta jahar Kano ta bayyana cewar babu tuhuma akan waɗanda ake zargin sakamakon rashin gamsassun hujjoji.
Mai Shari’a Ibrahim Sarki Yola ya ayyana cewar ya sallami Auwalu Danladi Sankara da Taslim Baba Nabegu nan take, kuma kotun ta umarci kowa ya zauna lafiya.
Wakilinmu Yusuf Nadabo Isma’il ya ruwaito cewa, da yake jawabi lauyan wanda ake ƙara Barrister Saddam Sulaiman, ya ce dama maganar siyasa ce ta shigo cikin al’amarin.
Rundunar ƴan sandan jihar Kano ta ce masu Garkuwa da mutane su biyun da ta kama a dajin Ɗansoshiya da ke kwanar Ɗangora a ƙaramar hukumar Ƙiru a jihar sun rasu.
Jami’in hulɗa da jama’a na rundunar ƴan sandan SP Abdullahi Haruna Kiyawa ne ya sanar da hakan a shafin sa na sada zumunta a cikin daren Asabar 09 ga watan Nuwamban 2024.
Tun dai da safiyar Asabar ne rundunar ta ce ta cafke mutane biyun da ta ke zarginsu da shiga jihar Kano, domin yin garkuwa da mutane tare da neman kuɗin fansa.
SP Abdullahi Haruna Kiyawa, ya bayyana cewa, an kama mutanen ne a garin Kwanar Dangora, kuma, suna hannun ‘yan sanda domin fadada bincike, ko da ike yanzu haka tuni suka riga mu gidan gaskiya.
Majiyar Dala FM Kano ta rawaito cewa SP Kiyawa ya kuma ƙara da cewa, yanzu ta’addancin satar mutane ba za ta yi tasiri a Jihar Kano ba da yardar Allah’.
Mai magana da yawun rundunar ƴan sandan na Kano, ya kuma gode wa al’ummar jihar bisa addu’o’in da suke yi a kullum.
Tuni dai Kiyawa ya wallafa hotunan gawar mutanen biyu da ake zargin masu garkuwa da mutane ne a shafin sa na Facebook.
-
Nishadi5 years agoIna neman mijin aure – Rayya
-
Labarai4 years agoHamisu Breaker ya kai kan sa wajen ‘yan sanda
-
Nishadi5 years agoMansura Isah ta yi kaca-kaca da Sadiya Haruna
-
Manyan Labarai5 years agoKAROTA: An baiwa Baffa Babba wa’adin kwanaki bakwai
-
Labarai5 years agoAuren dan Panshekara da ba Amurkiya ya samu cikas
-
Lafiya2 years agoRahoto: An gano wani gida da ake gini da takardun Kur’ani da Alluna
-
Manyan Labarai5 years agoSabuwar damfarar da ta fito a Kano
-
Nishadi5 years agoAn gano daliban da Adam Zango ya dauki nauyin karatun su