Manta Sabo
Kotu ta gindaya sharuɗa ga ƴan Daudun da ake zargin kai wa ofishin Hisbah Hari kafin bada berlin su a Kano.
Babbar kotun shari’ar Muslunci da ke zamanta a Shahuci, karkashin jagorancin mai Shari’a Muhammad Sani, ta bayar da belin matasannan da ake zargin sun farfasa motar hukumar Hisba, tare da yunkurin ƙona ofishin hukumar na Bachirawa karshen kwalta da ke Kano.
Tun da farko, ƴan sanda ne suka yi zargin matasan da laifukan haɗa baki, da barnatar da kayan gwamnati, da kuma yunƙurin ƙone ofishin Hisbah.
Lamarin dai ya faru ne a unguwar Bachirawa titin jajira, inda ƴan kwamitin unguwar suka kama wasu karti suna zagaye gidan Tururuwa da talatainin dare, bayan an kama sune kuma waɗannan matasa da ake zargin ƴan Daudu ne suka kai wa ofishin Hisbar na yankin hari.
A yayin da yake bayyana matsayar kotun mai Shari’a Muhammad Sani, ya ayyana cewar kotun ta bayar da belin su, sai dai ya gindaya musu wasu sharuɗa.
Daga cikin sharuɗan, kotun ta ayyana cewar sai an ajiye kaso daya bisa uku na abin da ake zargin sun lalata, idan kuma suka tsere mai karbar belin zai biya dubu dari biyu akan kowane mutum daya, an kuma ayyana cewar ɗan uwa na jini shine kawai yake da ikon karƙar belin idan kuma sun sake aikata wani laifin to belin ya karye.
Kotun ta sanya ranar 22 da 23 ga watan gobe dan fara sauraron shaidu.
Wakilinmu Yusuf Nadabo Ismail ya ruwaito cewar matasan sun hadar da Nasiru Hamisu Na kabara, da Auwal Haruna da kuma mutum 3.
Manta Sabo
Kotu ta hana duk wata kafar yada labarai yin labarin da ya shafi Auwalu Danladi Sankara da Taslim Baba Nabegu.
Babbar kotun jaha mai lamba 4 karkashin jagorancin mai Shari’a Usman Na Abba ta yi hani ga duk wasu Jami’an Ƴan sanda ko na duk wata hukuma ta daban daga gayyata ko tsangwama, ko kuma bincike ko kamawa, ta kowace siga ga kwamishinan ayyuka na musamman na jihar Jigawa Auwalu Ɗanladi Sankara.
Wannan dai na zuwa ne bayan da kotu ta wanke Auwalu Sankara daga zargin mu’amala ko alaƙa da juna tsakanin mai ƙara da Taslim Baba Nabegu har zuwa lokacin sauraran ƙarar.
Kotun ta kuma amince da rokon da wani lauya mai suna Barrister I.C Ekpinovi ya yi amadadin mai kara Auwalu Danladi Sankara wanda ya yi karar Nasiru Buba.
Mai karar ta bakin lauyansa ya bayyana wa kotun rokonsa inda ya roki kotun da ta dakatar da wanda ake kara ko dai shi da kansa ko kuma ƴan korensa daga ci gaba da yaɗa wata magana wadda wata babbar kotun Shari’ar Muslunci da ke Kano ta rufe.
Mai Shari’a Usman Na Abba ya ayyana cewar ko dai wanda aka yi kara ko yan korensa ko kuma wasu wakilansa, da a dai na yaɗa waccan magana har zuwa lokacin da kotun za ta saurari kowanne ɓangare.
Kotun ta ayyana cewar ta yi hani ga duk wata kafa ta yada labarai ko dai Rediyo ko Talabijin, ko shafukan sada zumunta da kafar Intanet da duk wata kafa wadda take iya sadar da labarai, daga yaɗa labaran da suka shafi Auwalu Ɗanladi Sankara da Taslim Baba Nabegu.
A ranar Talata ne dai gwamnan jihar Jigawa Mallam Umar Namadi ya bayyana mayar da Auwalu Ɗanladi Sankara muƙamin sa na Kwamishinan ayyuka na musamman a jihar, bayan da kotu ta wanke shi daga zargin da hukumar Hisbah ta Kano, ta yi masa kan zargin baɗala da wata matar aure.
Wakilinmu Yusuf Nadabo Isma’il ya ruwaito cewa kotun ta kuma sanya ranar 28 ga wannan watan na Nuwamba dan sauraron kowane ɓangare akan shari’ar.
Manta Sabo
Kotu ta dakatar da rantsar da Ali Musa Wardwoker ko Ghali Basaf a matsayin shugaban ƙaramar hukumar Kumbotso
Babbar Kotun jaha mai lamba huɗu da ke zamanta a sakateriyar Audu Bako a Kano, ƙarƙashin jagorancin mai Shari’a Usman Na’abba, ta bayyana matsayarta akan hukuncin da ta yanke dangane da shari’ar da ake yi a tsakanin Ali Musa Hardworker da Jam’iyyar NNPP a Kano.
Kotun ta ayyana cewar kowanne ɓangare ya dakata da batun rantsuwar kama aiki har zuwa lọkacin da kotun ɗaukaka ƙara za ta ayyana matsayarta.
Idan dai ba’a manta ba Dala FM ta ruwaito yadda a baya kotun ta ayyana Ali Musa Hardworker a matsayin halastaccen ɗan takarar lamarin da ya sanya jam’iyyar NNPP da Ghali Basaf suka ɗaukaka ƙara akai.
Babbar Kotun jaha mai zamanta a miller road karkashin jagorancin mai Shari’a Maryam Ahmad Sabo, ta yi umarnin yan sanda su fadada bincike akan wani matashi mai suna Haruna Buhari wanda ake zargi da laifin kutse da sata.
Tunda fari dai an zargi Haruna da kutsawa cikin ofishin mai Shari’ar tare da ɗauke wayar salula ta direban mai shari’ar wadda aka jona caji a ofishin ta.
Tuni dai yan sandan kotun suka fice da shi daga Harabar kotun dan mika shi shelkwatarsu da ke Bompai, domin gudanar da binciken.
Wakilinmu Yusuf Nadabo Ismail ya zanta da wani shaidar gani da ido wanda yace daman an dame su da satar takalma a masallacin harabar kotun idan sun je Sallah, a Masallaci.
Mai korafin dai ya kuma bayyana cewar an fi satar takalman alkalai a masallacin.
-
Nishadi5 years agoIna neman mijin aure – Rayya
-
Labarai4 years agoHamisu Breaker ya kai kan sa wajen ‘yan sanda
-
Nishadi5 years agoMansura Isah ta yi kaca-kaca da Sadiya Haruna
-
Manyan Labarai5 years agoKAROTA: An baiwa Baffa Babba wa’adin kwanaki bakwai
-
Labarai5 years agoAuren dan Panshekara da ba Amurkiya ya samu cikas
-
Lafiya2 years agoRahoto: An gano wani gida da ake gini da takardun Kur’ani da Alluna
-
Manyan Labarai5 years agoSabuwar damfarar da ta fito a Kano
-
Nishadi5 years agoAn gano daliban da Adam Zango ya dauki nauyin karatun su