Rundunar tsaron nan mai yaki da fadan Daba da ƙwacen Waya da kawar da Shaye-shaye ta Anty Snaching da ke jihar Kano, ta sha alwashin ci gaba da kakkabe bata garin da ke addabar al’umma da fadan Daba a sassan jihar, domin ƙara wanzuwar zaman lafiya a fadin jihar.

Kwamandan rundunar Inuwa Salisu Sharada, shi ne ya bayyana hakan a zantawarsa da gidan redivon Dala FM, a ranar Litinin.

Ya ce za su ci gaba da kokari wajen shiga lungu da sako wajen kawar da dukkanin masu kokarin tayar da hankalin al’umma, duk kuwa da ƙalubalen da suke fuskanta.

“Daga cikin ƙalubalen da muke fuskanta akwai ƙarancin motar fita aiki domin mota ɗaya muke da ita, idan jami’an mu za su fita aiki da mutane da yawa sai dai su hau Baburan Adai-dai Sahu, duk hatsarin wuri; akwai mota a gidan gwamnatin Kano muna fatan gwamna zai bamu ita a ciki gaba da aiki, “in ji Inuwa”.

Kazalika Sharada ya kuma ƙara da cewa akwai buƙatar al’umma su ƙara himma wajen ba su hadin kan da ya dace domin ganin sun kara samun dama wajen magance matsalar tsaro musamman ma ta fadace-fadacen Daba, da ta addabi al’umma a sassan jihar Kano.

A cewar sa, “Ƙarancin motocin fita aikin na ba mu matsala domin a wasu lokutan daga wuri mai nisa ake kiran mu don kai ɗauki akan matsalar tsaro, amma rashin wadatattun motocin mukan fuskanci ƙalubale, “in ji shi”.

Wannan dai na zuwa ne yayin da al’umma ke a gaba da neman dauki wajen magance matsalar tsaron da ke damun su a sassan jihar, musamman ma a wasu unguwanni da ke ƙwaryar bimin Kano.

Wasu lauyoyi ƙarƙashin jagorancin Barrister Yusuf Sulaiman, sun yi martani akan wani labari da wata kafar yaɗa labarai ta zamani take yadawa, da ta ke cewa wai wani mutum ya sa an aike da yaronsa gidan gyaran hali da tarbiyya.

Labarin dai ya bayyana cewar wai dan mutumin ya nemi yaron nasa domin ya yi aikin alfasha dashi, shi kuma yaƙi amincewa da hakan, lamarin da lauyoyin suka ce wannan labari ba shi da tushe ballantana makama.

Barrister Yusuf Sulaiman, ya bayyana cewar labarin da waccan kafar yada labarai ta Internet take yaɗawa ba gaskiya ba ne ba.

Lauyan ya bayyana hakan ne a yayin taron manema labaran da lauyoyin suka gudanar, ya kuma ce akwai Shari’a a gaban babbar Kotun Shari’ar Muslunci ta Kumbotso a jihar Kano, wadda Ƴan Sanda suka gurfanar da wani matashi mai suna Khalifa Garba wanda ake zargi da laifin bata sunan wani mutum mai suna Alhaji Sa’idu Iliyasu.

A zaman kotun na baya dai matashin ya amsa laifinsa na ɓata suna, lamarin da kotun ta sanya ranar Litinin 16 ga wannan watan domin ta hukunta shi.

Barrister Sulaiman, ya ƙara da cewa wannan kafar yaɗa labarai da ta sanya wannan labarin a kafafen sada zumunta na zamani, labarin da ta yada jita-jita ce kawai, kamar yadda wakilinmu Yusuf Nadabo Isma’il ya ruwaito.

Ƙungiyar kare haƙƙin ɗan adam ta Sustainable Growth Initiatives for human Right Development, ta ce akwai buƙatar gwamnatin Kano ta ƙara sanya idanu tare da ɗaukar tsattsauran mataki akan waɗanda ke samar da tashar motoci barkatai a gefen hanya ba bisa ka’ida ba, domin gujewa abinda ka iya zuwa ya dawo a sha’anin tsaro.

Shugaban gudanarwar ƙungiyar Kwamared Salisu Ibrahim ya bayyana wa Dala FM hakan, ya ce ta hanyar ɗaukar matakin ne za’a magance barazanar tsaron da buɗe tashoshin motocin barkatai ke haifarwa.

A cewar sa, “Mafi yawan lokuta wasu suna buɗe tashoshin Mota musamman ma a irin su kan titin Zariya, ba a hukumance ba, su kuma wasu mutane na zuwa su hau mota ba tare da sanin motar waye ba wanda hakan kan taka rawa wajen haifar da matsalar tsaro, ‘in ji Salisu”.

Ya kuma yi kira ga fasinjoji musamman ma masu zuwa tashoshin da aka buɗe su ba bisa ƙa’ida ba, da su guji zuwa don hawa Mota, domin gujewa abin da ka iya zuwa ya dawo.