Labarai

Mun yi kotun tafi da gidan ka a kan kin saka safar baki da hanci – Ganduje

Published

4 years ago

26/07/2020

Gwamnatin jihar Kano ta ce ta fito da kotun tafi da gidan ka da za ta rinka hukunta wadanda basa bin dokar sanya safar baki da hanci domin kariya daga yaduwar cutar Corona.

Dr. Abdullahi Umar Ganduje ya bayyana hakan ne a ranar Lahadi lokacin da ya ke sake kaddamar da rarraba safar baki da hancin a fadar gwamnatin jihar Kano.

Ya ce, “Za mu hada kai da jami’an tsaro da sauran masu ruwa da tsaki domin tabbatar da mutane na bin dokar saka safar baki da hanci”. Inji Gwamnan Kano

A nasa jawabin, shugaban kwamitin karta kwana kan cutar Corona kuma mataimakin gwamnan jihar Kano Nasir Yusif Gawuna, Ya ce “Nan bada dade wa ba in Allah ya yarda kamar yadda mai girma gwamna ya fada za’a yi maganin wannan cuta, wannan safa ta hanci da baki, idan mutane ba su manta ba kananan hukumomi sun bayar da aikin raba ta na milyan guda, itama gwamnatin Kano ta bayar da na milyan guda, a yanzu kuma ta kumae bayar da aikin na milyan guda, idan an yi lissafi, an yi na milyan uku kenan”. A cewar mataikin Gwamna

Da yake jawabi sarkin Kano Alhaji Aminu Ado Bayero ya ce, “Yanzu gwamnati da jami’an su an samu gangara a na samun sauki. Mu na kira da jama’a su ka ci gaba da bin dokokin gwannati, ta hanyar saka safa da wanke hannu da kuma bin shawarar likitoci. Wadanda mu ka rasa a dalilin wannan cuta Allah ya jikan su, wadanda su ka kamu Allah ya ba su lafiya. Mutane su daure wajen kiyaye kai a lokacin sallah, tare da hakura da yawace-yawace, domin Kare kai daga yaduwar cutar Corona”. Inji Sarkin Kano

Wakiliyar mu Zahra’u Nasir ta ruwaito cewa, Gwamna Dr Abdullahi Ganduje ya kuma ce, al’umma za su je sallar idi ranar sallah da kuma sallar juma’a a don haka ne ya bukaci mutane da yin addu’ar magance cutar Corona.

Labarai

Sarkin Kano Khalifa Muhammadu Sunusi na biyu, ya naɗa Ɗan Sa a matsayin Chiroman Kano.

Published

1 week ago

15/11/2024

Hassan Mamuda Ya'u

Mai martaba sarkin Kano Dakta Khalifa Muhammadu Sunusi na biyu, ya buƙaci dukkanin hakimansa da ke faɗin jihar nan da su mayar da hankali wajen gudanar da aikin su bisa gaskiya da riƙon Amana.

Sarkin ya bayyana hakan ne a lokacin da ya naɗa DSP Aminu Lamiɗo Sunusi a matsayin Chiroman Kano, kuma babban ɗan fadar Sarki, yau Juma’a a fadar sa.

Khalifa Muhammadu Sunusi na biyu, ya ce ya naɗa DSP Aminu Lamiɗo Sunusi a matsayin Chiroman Kano, ne bisa cancanta da zuminci da kuma gogewarsa akan aikinsa na ƴan sanda, tare kuma da taimakawa al’umma da yake yi a koda yaushe.

Mai martaba sarkin ya kuma taya Chiroman Kano, murna bisa wannan naɗin da aka yi masa, tare da fatan zai zamo jakada na gari musamman wajen samar da cigaban Al’umma da kuma masarautar Kano.

Wakilinmu na masarautar Kano Shamsu Da’u Abdullahi ya rawaito cewa taron naɗin ya samu halartar gwamnan jihar Kano Injiniya Abba Kabir Yusuf, da sarakunan gargajiya daga wasu daga cikin jahohin ƙasar nan.

Labarai

Za mu magance matsalolin da hukumar Hisbah ta Dala ke fuskanta – Shugaban ƙaramar hukumar Dala

Published

2 weeks ago

11/11/2024

Hassan Mamuda Ya'u

Ƙaramar hukumar Dala ta ce za ta yi bakin ƙoƙarin ta wajen magance matsalolin da hukumar Hisbah ta ƙaramar hukumar Dala ke fuskanta, domin ƙara ƙarfafa musu gwiwa wajen gudanar da ayyukan al’umma.

Shugaban ƙaramar hukumar Suraj Ibrahim Imam ne ya bayyana hakan, a lokacin da jami’an hukumar Hisbah ta ƙaramar hukumar Dala, suka ziyarce shi a ofishinsa, domin taya shi murnar nasarar cin zaɓe da suka yi, tare da sanar dashi halin da hukumar Hisbar ke ciki a halin yanzu.

“Daga cikin ƙalubalen da zan yi ƙoƙarin magance wa akwai samar da ruwa da wutar lantarki da kuma samar wa hukumar kayan aiki, bisa yadda suke fama da rashin su, “in ji Suraj Imam”.

Shugaban ƙaramar hukumar ta Dala Sura ya kuma yi kira ga babban kwamandan hukumar Hisbah ta jihar Kano Sheikh Aminu Ibrahim Daurawa, da ya ƙara kulawa da walwalar hukumar ta ƙaramar hukumar Dala bisa ƙalubalen da suke fuskanta.

Da yake nasa jawabin kwamandan hukumar Hisbah ta ƙaramar hukumar Dala Mallam Umar Bala Muhammad, ya ce sun ziyarci shugaban ƙaramar hukumar ne domin taya shi murnar nasarar cin zaɓe da kuma sanar da shi halin da hukumar ke ciki, domin haɗa ƙari da ƙarfe wajen magance ƙalubalen da suke fuskanta.

Wakiliyarmu Hadiza Balanti ta rawaito cewa Mallam Umar Bala ya kuma ƙara da cewa a shirye hukumar hisbar ta ƙaramar hukumar Dala take wajen gudanar da ayyukan al’umma babu gajiyawa.

Labarai

Mun dakatar da karɓar kuɗin haraji a Fagge har sai an kammala bincike – Shugaban Ƙaramar hukumar Fagge

Published

4 weeks ago

29/10/2024

Hassan Mamuda Ya'u

Ƙaramar hukumar Fagge ta dakatar da dukkannin harkokin karɓar haraji har zuwa lokacin da za’a kammala bincike, don tabbatar da cewa bangaren harajin nayin aiki bisa doka domin ciyar da ƙaramar hukumar gaba.

Shugaban ƙaramar hukumar ta Fagge Salisu Usman Masu ne ya bayyana hakan yayin zantawar sa da tashar Dala FM Kano, a safiyar yau Talata.

Salisu Usman ya kuma bayyana cewar duk filotan da aka yanka aka sayar ko aka bayar ba bisa ƙa’ida ba shima an soki shi.

Shugaban ya kuma yi kira ga ƴan kwangila waɗanda suka watsar da ayyukan da aka basu da su dawo bakin aiki ka’in da na’in.

A cewar sa, “Na fahimci irin kalubalen da ke damun al’umma a ɓangaren lafiya a ƙaramar hukumar mu ta Fagge; kuma za mu yi ƙoƙarin samar da kayan aiki domin magance matsalar, “in ji shi”.

Masu ya kuma bayyana cewar ƙaramar hukumar ta Fagge za ta inganta harkar ilimi da tsaro, da Lafiya, inda kuma yi kira ga duk wani mai kaunar ci gaban karamar hukumar Fagge da ya taho a hada hannu ko da shawara zai bayar dan ciyar da karamar hukumar gaba.