Manyan Labarai

Labarai a takaice na yau Laraba 17-04-2019

Published

6 years ago

17/04/2019

4:14pm Hukumar kula da harkokin shari’a da ladaftarwa NJC ta tabbatar da Justice Nura Sagir Umar a matsayin sabon babban jojin jihar Kano.

Kakakin kotunan Kano, Baba Jibo Ibrahim ne ya bayyana hakan cikin zantawarsa da wakilin mu Yusuf Nadabo Isma’il.

Rundunar ‘yansandan jihar Kano, ta fara gudanar da bincike kan wata mata mai suna Hassana Lawan mai shekaru 15 wacce ake zargin ta da zubawa mijinta mai suna Sale Abubakar mai shekara 33 shinkafar bera a cikin abinci a unguwar Bechi dake karamar hukumar Kumbotso.

A cikin wata sanarwa mai kunshe da sa hannun Kakakin rundunar, DSP Abdullahi Haruna Kiyawa, ta ce yanzu haka mai gidan ta Sale Abubakar, ya na asibitin Murtala ana duba lafiyar sa ita kuma matar ta sa an tsare ta ana cigaba da tuhumar ta dazarar sun kammala za a gurfanar da ita a gaban kuliya.

Limamin masallacin Juma’a na Triumph Malam Lawan Abubakar, ya yi Kira ga al’umma da su rungumi turbar addu’a da ayyuka na gari, domin ta hakane za’a sami saukin yawan satar mutane da sunan kudin fansa da ake samu a wasu sassan kasar nan.

Da yake zantawa da wakilin mu Ahmad Rabi’u Ja’en, Malam Lawan ya kuma ce “matukar hukuma za ta rinka zartas da hukunci ga irin wannan mutane to babu shakka sai an samu raguwar yin garkuwa da mutane a matsayin a matsayin kudin fansa.

Hukumar Hisba a jihar Kano, ta kau want simame wata mashayar barasa dake ‘yan Katako a unguwa Uku a wani yunkuri na dakile aikata miyagun ayukan badala a sassan jihar Kano.

Yayin simamen dai jami’an hukumar Hisba sun sami nasarar kama mai siyar da barasa tare da masu shanta Wanda hukumar ta ce za ta kai su kotu domin girbar abun da suka shuka.

11:00am Rundunar ‘yansandan jihar Kano ta ce ta fara gudanar da bincike a kan rasuwar wasu matasa biyu da jirgin kasa ya bi takan su a daren Litinin din da ta gabata sakamakon barci da su ka yi a kan titin jirgin bisa shaye-shaye da ake zargin sun yi a lokacin.

Kakin rundunar, DSP Abdullahi Haruna Kiyawa ne ya bayyana hakan ya na mai cewa ”jami’an ‘yan sanda ne su ka dauke gawar matasan biyu zuwa Asibiti wanda likita ya tabbatar da mutuwar su”, a hannun guda kuma mun tuntubi hukumar kula da sifirin jirgin kasa dake Kano sai dai ta ce babu abin da za ta ce a kan lamarin.

Kotun Majistret mai lamba 35 karkashin mai shari’a, Sunusi Usman Atana, ta fara sauraron wata Kara da ‘yansanda su ka gurfanar da wani mutum mai suna Sulaiman Aliyu wanda ake zargin sa da laifin zamba cikin aminci da cuta wanda laifukan sun saba da sashi na 312 da na 322 kundin penal code.

Tun da fari dai wani mai suna Alh Sabi’u Muhammad ne ya shigar da Kara cewa ya baiwa Sulaiman naira miliyan daya da dubu 200 da 26 don ya yi masa safarar shinkafa buhu dari da hamsin da uku Amma Sulaiman tasarrafi da kudin sai dai kuma ya musanta zargin Wanda tini kotun ta sanya ranar 15 ga watan gobe don kawo shaidu.

Shugaban kungiyar masu sana’ar siyar da Nono a kasuwar Kofar Wambai a jihar Kano, Malam Muhammad Lawan Alaramma, ya ce “kungiyar su ta dauki gabarar tsaftace harkokin sana’ar siyar da Nono a wani mataki na zamanantar da sana’ar siyar su.

Yayin zanatawarsa ga manema labarai da ya yi, Malam Muhammad Alaramma, ya ce”tuni kungiyar ta dauki matakin yin rijista ga masu gudanar da sana’ar nono don magance bata gari a harkar.

Manta Sabo

Kotu ta hana duk wata kafar yada labarai yin labarin da ya shafi Auwalu Danladi Sankara da Taslim Baba Nabegu.

Published

3 days ago

19/11/2024

Hassan Mamuda Ya'u

Babbar kotun jaha mai lamba 4 karkashin jagorancin mai Shari’a Usman Na Abba ta yi hani ga duk wasu Jami’an Ƴan sanda ko na duk wata hukuma ta daban daga gayyata ko tsangwama, ko kuma bincike ko kamawa, ta kowace siga ga kwamishinan ayyuka na musamman na jihar Jigawa Auwalu Ɗanladi Sankara.

Wannan dai na zuwa ne bayan da kotu ta wanke Auwalu Sankara daga zargin mu’amala ko alaƙa da juna tsakanin mai ƙara da Taslim Baba Nabegu har zuwa lokacin sauraran ƙarar.

Kotun ta kuma amince da rokon da wani lauya mai suna Barrister I.C Ekpinovi ya yi amadadin mai kara Auwalu Danladi Sankara wanda ya yi karar Nasiru Buba.

Mai karar ta bakin lauyansa ya bayyana wa kotun rokonsa inda ya roki kotun da ta dakatar da wanda ake kara ko dai shi da kansa ko kuma ƴan korensa daga ci gaba da yaɗa wata magana wadda wata babbar kotun Shari’ar Muslunci da ke Kano ta rufe.

Mai Shari’a Usman Na Abba ya ayyana cewar ko dai wanda aka yi kara ko yan korensa ko kuma wasu wakilansa, da a dai na yaɗa waccan magana har zuwa lokacin da kotun za ta saurari kowanne ɓangare.

Kotun ta ayyana cewar ta yi hani ga duk wata kafa ta yada labarai ko dai Rediyo ko Talabijin, ko shafukan sada zumunta da kafar Intanet da duk wata kafa wadda take iya sadar da labarai, daga yaɗa labaran da suka shafi Auwalu Ɗanladi Sankara da Taslim Baba Nabegu.

A ranar Talata ne dai gwamnan jihar Jigawa Mallam Umar Namadi ya bayyana mayar da Auwalu Ɗanladi Sankara muƙamin sa na Kwamishinan ayyuka na musamman a jihar, bayan da kotu ta wanke shi daga zargin da hukumar Hisbah ta Kano, ta yi masa kan zargin baɗala da wata matar aure.

Wakilinmu Yusuf Nadabo Isma’il ya ruwaito cewa kotun ta kuma sanya ranar 28 ga wannan watan na Nuwamba dan sauraron kowane ɓangare akan shari’ar.

Manyan Labarai

Zargin Baɗala: Kotu ta wanke Auwalu Sankara da Taslim Baba Nabegu a Kano.

Published

4 days ago

18/11/2024

Hassan Mamuda Ya'u

Babbar kotun Shari’ar Muslunci mai zaman ta a kofar kudu ƙarƙashin jagorancin mai Shari’a Ibrahim Sarki Yola, ta sallami dakataccen kwamishina a jihar Jigawa, Auwalu Ɗanladi Sankara da Taslim Baba Nabegu.

Tun da farko kotun ce ta tura ofishin ƴan Sanda Shiyya ta ɗaya da ke jihar Kano, wato Zone 1, domin mukaddashin babban sifetan yansanda ya binciki zargin da ake wa Auwalu Danladi da Taslim Baba Nabegu, sakamakon korafin da wani mutum Mai suna Nasiru Buba ya yi, wanda ya zargi Auwalun da cewar suna yin mu’amalar da bata dace ba.

Cikin ƙunshin takaddar da muƙaddashin babban sifetan ƴansanda ya tura wa kotun ya bayyana cewar, hukumar Hisbah ta yi azarɓaɓi akan batun, kuma ya umarce su da su rinƙa yin aiki a bisa tsarin doka.

A zaman kotun na yau mai Shari’a Sarki Yola ya ayyana cewar babu tuhuma akan waɗanda ake zargin sakamakon yadda ƴan sanda suka gudanar da bincike, inda suka ce sun samu cewar maganar Jita-jita ce kuma Shari’a bata karɓar jita-jita.

Har ila yau, ma’aikatar Shari’a ta jahar Kano ta bayyana cewar babu tuhuma akan waɗanda ake zargin sakamakon rashin gamsassun hujjoji.

Mai Shari’a Ibrahim Sarki Yola ya ayyana cewar ya sallami Auwalu Danladi Sankara da Taslim Baba Nabegu nan take, kuma kotun ta umarci kowa ya zauna lafiya.

Wakilinmu Yusuf Nadabo Isma’il ya ruwaito cewa, da yake jawabi lauyan wanda ake ƙara Barrister Saddam Sulaiman, ya ce dama maganar siyasa ce ta shigo cikin al’amarin.

Manyan Labarai

Masu Garkuwa da mutanen da muka kama a dajin Ɗansoshiya sun rasu – Ƴan Sandan Kano

Published

2 weeks ago

09/11/2024

Hassan Mamuda Ya'u

Rundunar ƴan sandan jihar Kano ta ce masu Garkuwa da mutane su biyun da ta kama a dajin Ɗansoshiya da ke kwanar Ɗangora a ƙaramar hukumar Ƙiru a jihar sun rasu.

Jami’in hulɗa da jama’a na rundunar ƴan sandan SP Abdullahi Haruna Kiyawa ne ya sanar da hakan a shafin sa na sada zumunta a cikin daren Asabar 09 ga watan Nuwamban 2024.

Tun dai da safiyar Asabar ne rundunar ta ce ta cafke mutane biyun da ta ke zarginsu da shiga jihar Kano, domin yin garkuwa da mutane tare da neman kuɗin fansa.

SP Abdullahi Haruna Kiyawa, ya bayyana cewa, an kama mutanen ne a garin Kwanar Dangora, kuma, suna hannun ‘yan sanda domin fadada bincike, ko da ike yanzu haka tuni suka riga mu gidan gaskiya.

Majiyar Dala FM Kano ta rawaito cewa SP Kiyawa ya kuma ƙara da cewa, yanzu ta’addancin satar mutane ba za ta yi tasiri a Jihar Kano ba da yardar Allah’.

Mai magana da yawun rundunar ƴan sandan na Kano, ya kuma gode wa al’ummar jihar bisa addu’o’in da suke yi a kullum.

Tuni dai Kiyawa ya wallafa hotunan gawar mutanen biyu da ake zargin masu garkuwa da mutane ne a shafin sa na Facebook.