Jami’in hulda da jama’a na kasuwar sayar da dabbobi da ke Kofar Na’isa, Kwamared Umar Hamisu Kofar Na’isa ya ce, rashin iya sarrafa naman rakumi wajen dafawa kan sanya shi yin tauri.

Kwamared Umar Hamisu Kofar Na’isa ya bayyana hakan ne a zantawar sa da gidan gidan rediyon Dala ranar Talata.

Ya ce, “Mu nan jihar Kano ba mu saba da yanka rakumi a matsayin abun layya ba, za ka ga idan a ka ce, gida za’a yanka rakumi abun ya zama abun kallo, za’a cika yara da manya an zo kallon yanka rakumi, amma lokaci na tafiya, da ya ke an ce zamani canjawa yake, kusan daga shekaru uku zuwa mutane sun fara fahimtar yanka rakumi, kuma mu na nan mu na bincike a kan batun shin tsakanin rakumi da sa wanne yafi nama? Kamar mu yanzu idan kwastoma ya zo mu na wasa kasuwar mu da cewar, rakumin dubu dari da hamsin zai iya baka naman sa na dubu dari da tamanin”.

Kwamared Umar, ya kuma ce, “Rashin fahimta ne, a na yawan cewa naman rakumi yafi tauri, tunda an fi sabawa da yanka sa, ta bangaren sarrafawa ne idan har uwar gida, ko kuma wadanda za su sarrafa naman sun goge da yadda za su iya sarrafa naman rakumi, to ba za ka iya banbance naman rakumi da naman sa ba, domin za ka iya zuwa kasuwa ka sayi naman rakumin ba kasan shi ba ne ba”.

Ya kara da cewa, “Rakumi ba kayar da shi a ke yi kamar sa ba, a kan dan yi masa ‘yan dabaru ya kwanta, idan ma bai kwanta ba za’a sa igiyoyi a kafafunsa guda biyu a ja su, a rike kafafun sa guda biyu na gaba sai a hade su a sa igiya a daure tsakanin gwiwar hannun, sai kafafun ya kwanta, shi ba sai an kwantar da shi ya yi rigingine ba, shi zaman rakumi tankwashe kafa ya ke yi, kafafun da ya tankwashe sai a sa igiya, wannan dogon wuyan na sa sai a jawo igiya kan ya lakwanshe ya hadu da gangar jiki sai a daure kan”.

Kazalika, ya kuma ce, “Yadda ake yanka rakumi ba yadda ake yanka sa ba ne, shi ba tsakiyar wuyan sa a ke yanka wa ba, shi kuma rakumi a na yanka shi ta tsakanin wuyan na sa da gangar jiki, akwai wani rami da ake sa mun wuka mai tsini sai a caka a jata gefe da gefe, daga nan rakumi ya yanku, sai kuma fida, shi kuma rakumi ta baya ake fede shi”. A cewar Kwamared Umar Kofar Na’isa

Wakilin mu Tijjani Adamu ya rawaito cewar, Kwamared Hamisu ya kuma ce, babban rakumi wanda a ka saba da hawan sa, yafi saukin yankawa a kan matashin rakumi wanda yanka shi ya ke bayar da wahala.