Manyan Labarai

Ba kan ta: An sace birkin jirgin sama guda 80 a Kano

Published

2 days ago

15/01/2025

Kotun majistret mai lamba 70 da ke jihar Kano, ƙarƙashin jagorancin mai Shari’a Faruk Ibrahim Umar, ta aike da wasu mutane gidan ajiya da gyaran hali bisa zargin su da haɗa baki da Sata.

Ƙunshin zargin da ake yi wa mutanen ya ayyana cewar, a ranar 11 ga watan 12 na shekarar da ta gabata ta 2025, wani mutum mai suna Otaru Bashir ma’aikaci a kamfanin sifirin jiragen sama na Azman, ya yi ƙorafi cewar mai gadin kamfanin nasu ya haɗa baki da wasu mutane sun sace musu birkin jirgin sama guda 80.

Ana dai zargin mutanen ne da sace waɗannan barakun wato birkin jirgin sama guda tamanin a filin jirgin tashi da saukar jiragen sama na Malam Aminu Kano.

Mutanen da ake zargin sun hadar da Nuhu Auwalu da Yakubu Bala da Emanuel Luka, sai kuma safiyanu Abdullahi.

Ko da aka karanta wa mutanen ƙunshin zargin da ake yi musu dukkaninsu sun musanta, a nan ne kotun ta aike da mutanen gidan gyaran hali tare da sanya ranar 11 ga watan gobe dan sauraron shaidu akan shari’ar.

Wakilinmu Yusuf Nadabo Isma’il ya ruwaito cewar, yayin zaman kotun an ambata cewar, binciken ƴan sanda ya bayyana cewar kimar kayan ya kama Naira miliyan dari da arba’in, sai dai yayin bincike an gano birkin jirgin guda uku a hannun wanda ake zargi na uku mai suna Yakubu Bala.

Manyan Labarai

Wata Sabuwa: Lauya ya nemi kotu ta kama kwamishinan Shari’a na jihar Kano

Published

1 day ago

16/01/2025

Hassan Mamuda Ya'u

Wani lauya mai zaman kan sa a jihar Kano Barista Haruna Musa Muhammad, ya yi ƙorafi a gaban babbar kotun tarayya da ke zamanta a jihar, akan ta kama kwamishinan Shari’a na jihar Kano Barista Haruna Isah Dederi, da wasu manyan mukarraban gwamnatin jihar.

Lauyan wanda yake wakiltar mai kara Nura Bashir Ahmad, ya bayyana cewar gwamnatin jihar Kano ta rushe wa Nura gida duk da cewar ya samu hukunci a babbar kotun tarayya akan kada a rushe masa gidan.

Cikin wata ƙunshin Shari’a mai lamba FHC/KN/CS/240/2023, mai Shari’a Simon Amobida, ya ayyana cewar kotun tarayya ta gamsu da takardun mallaka da mai ƙara Bashir Ahmad ya gabatar mata, don haka ne ma ta ayyana cewar gidan mallakinsa ne.

Kotun dai tun a ranar 13 ga watan biyu na shekarar da ta gabata ta 2024, ta zartas da hukuncin akan batun.

Mai karar Bashir ta bakin lauyansa Barista Haruna Musa, sun bayyana cewar sun rubuta koke zuwa gaban kotun da ta yi hukuncin tun da dai suna zargin waɗanda ake ƙarar sun raina wannan hukunci kamar yadda ya bayyana a zantawar sa da wakilin Dala FM Kano.

Akan wannan batu ne wakilin namu ya tuntuɓi kwamishinan Shari’a na jihar Kano Barista Haruna Isah Dederi, ta wayar salula, sai dai bai samu damar ɗaa wayar ba, ya kuma aike masa da gajeren saƙon kar ta kwana nan ma bai bada amsa ba, amma yana dakon sa.

Manyan Labarai

Budurwa ta mutu yayin wata Gobara da ta kama cikin gidan su a Kano

Published

1 day ago

16/01/2025

Hassan Mamuda Ya'u

Wata Gobara da ta tashi a wani gida ta yi sanadiyyar rasuwar wata budurwa a unguwar Ja’en Sabere da ke ƙaramar hukumar Gwale a Kano da ke arewacin Najeriya, tare da ƙonewar wasu sassan gidan.

Mamallakin gidan da lamarin ya faru mai suna Saminu Abba ne ya tabbatar wa tashar Dala FM faruwar lamarin a ranar Alhamis, 16 ga watan Janairun 2025.

Ya ce gobarar ta tashi ne da misalin ƙarfe ɗaya na daren jiya Laraba, lamarin da jami’an hukumar kashe Gobara ta jihar Kano da ma ƴan Bijilanten yankin da sauran al’umma suka kai ɗauki.

“Muna cikin Bacci muka ji wata ƙara da ihun mutanen unguwa, da muka tashi muka ga Gobara ce ta tashi a wasu sassan gidan mu kuma wutar ta tare hanyar da za mu fita gashi tana ci ba ƙaƙƙautawa, “in ji Saminu”.

Ya ci gaba da cewa, “Bayan jami’an hukumar kashe Gobara da ƴan Bijilanten yankin, da sauran al’umma sun kawo musu ɗauki, ne aka fasa Gini ta gidan maƙotan su inda su shida suka fita daga gidan sai dai ƴar su budurwa mai shekaru 18 mai lalurar Sikila ta rasu”.

Mallam Saminu Abba ya ƙara da cewa, kayayyakin su na sawa da wasu tarin kayayyaki da dama ne suka ƙone ƙurmus, lamarin da ya nemi ɗaukin mahukunta da su kai musu ɗauki bisa halin da suka samu kan su a ciki.

Manyan Labarai

Abin takaici ne yadda wasu jihohi har yanzu su ka gaza biyan ma’aikata sabon albashi – PRP

Published

5 days ago

13/01/2025

Hassan Mamuda Ya'u

Jam’iyyar hamayya ta PRP a Najeriya, ta yi Allah wa-dai da yadda har kawo yanzu wasu jihohi a ƙasar suka gaza fara biyan ma’aikatan jahohin su mafi ƙarancin albashi, duk kuwa da cire tallafin man fetur da shugaban ƙasa Bola Tinubu ya yi, ya jefa rayuwar al’umma cikin ƙuncin rayuwa.

Hakan na ƙunshe ne ta cikin saƙon sabuwar shekara mai ɗauke da sa hannun mataimakin shugaban Jam’iyyar PRP na Arewa maso Yammacin ƙasa Abba Sule Namatazu, ya fitar ga manema labarai a ƙarshen makon nan.

“Jam’iyyar mu tana sane da shirin gwamnatin Tarayya na mayar da wasu makarantu Gwamnati masu zaman kansu da hakan ka iya tilastawa matasa da dama barin Makaranta, inda wasu ka iya fadawa cikin halin aikata laifuka, baya ga yadda rashin tsaro ke kara ta’azzara zuwa sassan Najeriya, “in ji Namatazu”.

Har ila yau, jam”iyyar hamayya ta PRP, ta nuna takaicinta kan yadda har yanzu Najeriya ba ta samu wani ci gaban azo-a-gani ba cikin shekara 64 da samun ‘Yancin kai, da kuma shekara 25 na mulkin Demukuraɗiyya ba tare da katsewa ba.

Namatazu, ya kuma ce bisa la’akari da shekarun da aka shafe da samun ƴancin kai, kamata ya yi ace ƙasar nan ta fita daga cikin ƙasashen da ke fama da talauci da rashin tsaro da cin hanci da rashawa, Sai dai hakan bata sami ba saboda rashin Ingantaccen shugabanci a cikin shekaru 25 daga 1999 zuwa yanzu.

Abba Namatazu ya kuma yi kira ga Gwamnatoci a kowane mataki da su ƙara ƙaimi wajen inganta fannnin aikin Gona, da lafiya, da Ilimi, da kuma Tsaro da sauraran fannonin ci gaban Al’umma.

Jam’iyyar ta PRP ta kuma bukaci ‘Yan Najeriya da su tabbatar da Kyakkyawan Shugabanci da kuma bibiyar shugabannin su.